梁振輝 香港資深出版人
同屬IT部門的婷婷、為為和輝仔，趁老頂出外開會，「前後腳1」到茶房開小差。
輝仔：有冇發覺我哋部門「零舍2」多「狗」㗎？
為為：話得係「狗」，肯定係「好狗3」喇！哈……
婷婷：唔好「開估4」住，畀我哋輪到嚟逐個估下先！嗱，為為，你估先！
為為：「癲狗」囉！
輝仔：喂，不如講埋點解先至估落去仲好玩喇！
為為：「癲狗」就梗係係又吠，唔係又吠，夠膽死咁就梗係講我哋個新老頂喇！
婷婷：點止吠，仲亂咁「點5」同埋一唔like就攞我哋嚟出氣㖭呀！咦，我懷疑佢有雙重身份！
輝仔：有乜證據先！
婷婷：佢成日同人講屋企幾「有米6」，咁肯定係「住洋樓，養番狗」喇；仲有佢話自己喺美國著名大學畢業，咁仲唔係「番狗」！
輝仔：婷婷，佢養「番狗」唔等於佢係「番狗」！仲有喺外國留學即係「讀番書」，點叫得佢做「番狗」啫！你咁講，「人唔笑狗都吠7」喇！哈哈哈…
為為：輝仔，唔好笑婷婷嚹，輪到佢估嘞！
婷婷：「無聲狗」，Calvin同Jean咪係呢類狗囉！佢兩個平時就唔聲唔聲，一睇準機會就「報寸8」，都唔知幾多人死喺佢兩個手上！
輝仔：婷婷，你睇人都睇得幾到個噃！
為為：又輪到我嘞，我估有「癩皮狗」！
婷婷：梗係指Leo喇！衰衰咁，成日口花花！
輝仔：撩下女同事啫，唔算係「癩皮狗」！咁講唔成立，講過第個！
為為：我諗冇囉！婷婷，你話嘞！
婷婷：為為，應該有嘅，不過我同你睇唔到啫！
輝仔：對，咪就係我哋呢班喺公司幫全人類「執頭執尾9」，做埋啲「狗屎垃圾」嘅「IT狗」囉！
為為：係呀，係呀，「IT狗做到嘔」，哈哈哈……
婷婷：仲有呀，「IT狗冇得唞」，哈哈哈……
輝仔：畀人點到頭都暈埋，尊嚴都冇晒，仲笑！
婷婷：係苦笑！有時我都會覺得自己好冇用！
為為：係喇，最冇癮係唔係做IT嘢，不過自己有幾多料自己知。人工有萬鬆啲，咪睇住先囉！
輝仔：其實至衰都係我哋，個舊老頂只不過係樣樣揸正嚟做，我哋就話頂佢唔順，夾埋嚟整走佢，唔係都唔使換咗隻「癲狗」嚟治我哋喇！
為為：呢啲咪叫「喺度唔珍惜，走咗感痛惜」囉！
輝仔：我就話「當家三年狗也嫌」至真！
為為：好叻咩，撈唔掂咪轉行，走唔甩咪學會接受呢等「狗臉的歲月」囉！
婷婷：好深奧呀！
輝仔：咪即係睇住呢班狗大帝啲面色嚟做人囉！
「番狗」指外國品種的狗。舊時，除了有錢人家才有能力居住在有獨立衛生設施的洋樓和養頭「番狗」，一般頂多「住唐樓，養唐狗」，所以有人用以下來形容生活舒適優雅的人：
住洋樓，養番狗
現今，「癲狗」是罵人話，形容某人在理據不足下用上言語或武力對別人瘋狂攻擊，予人喪失理智、胡作非為的印象。原來此等激烈的個人行為可在社會上營造出不和諧的氣氛，不過最為人詬病的還是給年輕一代一個非常壞的啓示——言行乖戾是解決問題的有效方式。
「無聲狗」喻平時不作聲，往往採取突然襲擊，教人防不勝防的人。以下俗語/歇後語告誡人們須對似無殺傷力的「無聲狗」作出防範：
無聲狗咬死人；無聲狗——咬死人
與「無聲狗」異曲同工的中西諺有：
吠犬不咬人；咬人狗不露齒
Barking dogs seldom bite.（吠叫的狗從不咬人）
「癩皮狗」，原指皮膚上長癩癬的狗，後多比喻在感覺上或道德上教人反感或憎惡的人。
「IT狗」，近年IT界的一個貶詞，指一些從事該界別的某些員工——大多是初入行的或有待磨練的。他們一般被指派一些瑣碎及較次的任務，甚至與IT無關的工作，常被別人看不起的同時或多或少也看不起自己。
現實生活中，以下的一種心態非常普遍：
當家三年狗也嫌
「當家」指總理家務。「三年」，是虛數，指一段不太短的時間。比喻總理事務的人容易惹人厭恨。理由是就算原來是不錯的措施，當習慣了就變得平平無奇，如沒更新就更覺厭倦了。
最後，讓筆者在這裡對「IT狗」們進一言：「IT狗」是IT界的基層，所付出的再少也是貢獻，所扮演的再平凡也是不可或缺的。是故即便受了委屈，亦要做好本分，且要深明以下的一種「生存」學問：
綁住就抵得打
意思是給人家綁住了，動彈不得，人家此時動手打你，你什麼也做不了，唯有默默地忍受着被打的痛楚。比喻形勢比人弱時就只得就範，暗喻沉得住氣就有翻身的希望。為此，「IT狗」們切忌妄自菲薄；通過不斷增值和慢慢兒的歷練，「IT狗」也有機會進身為「IT達人」的！
________________________
1.「前後腳」指某些人先後到達某個地點。
2.「零舍」指特別。
3.「好狗」這裡指行為十分陰險卑劣。
4.「估」，估計的意思；「開估」指打開謎底。
5.「點」指差遣。
6.「有米」比喻有錢。
7.「人唔笑狗都吠」喻所言所行無稽，令人失笑。
8.「報寸」指打小報告。
9.「執頭執尾」指負責那些非常瑣碎的事務。
【專欄簡體版】https://leoleung2016.wordpress.com/