■「法國佬」熱心帶堆熱狗請「熱狗」食。 影片截圖「無敵神駒」仇思達日前因為喺《熱血時報》個書展攤位附近食熱狗，結果就俾「熱狗」（「熱血公民」）前「首領」狗達（黃洋達）拖埋一班「熱狗」出手出口「招呼」，結果真係他朝君體也相同！話說已經唔再係「熱狗」嘅「法國佬」張珈衍前晚就話心痛自己班前戰友賣書賣到餓，特登買咗堆熱狗畀佢哋食啦，「熱狗」當然唔接啦。另外仲有一大班人去咗攤檔度圍佢哋，搞到班「熱狗」要縮返入檔攤，有網民形容，呢啲咪叫「黑吃黑」囉。
神駒日前喺書展直播食熱狗就俾狗達班人郁手郁腳，法國佬前晚就挑吓機，喺facebook搞咗個「2018灣仔書展美食酬賓週」直播，諗住「探討」呢個問題。所謂見面三分情，去見自己班舊戰友始終唔可以兩手空空，所以佢都「好熱心」咁特登買咗堆熱狗去「探班」。
買埋熱狗去書展「探班」
法國佬又知《熱時》個攤位拍烏蠅咁款，特登帶咗成百幾個「益友」去，包括「獨」友陳家駒等，真係有咁盡玩咁盡。
狗達孖老婆縮喺收銀位
對家來勢洶洶，班「熱狗」今次只好企喺檔口，振咗一晚夫綱嘅狗達就孖埋老婆殘獸胃（陳秀慧）縮咗喺收銀位嗰度，由幾隻攔路「熱狗」擋住條路，以免「益友」全面進場。一堆「益友」繼續叫囂「我哋𠵱加請你哋食熱狗咋喎」、「尋晚（大前晚）十幾個人圍兩個人喎」，氣勢仲勁過之前狗達兇神駒。
法國佬就隔空叫狗達「黃生你收返我啦」，又問佢之前眾籌嗰194萬去咗邊，當然最後狗達就施展「龜縮大法」，唔肯見法國佬啦，事後法國佬就喺fb鬧狗達「正一縮頭烏龜」。
之前俾「熱狗」圍嘅「JoJo Wu」亦喺fb度分享呢件事，吐返口烏氣，寸爆咁話「熱狗變死狗」，「事實證明，『熱血公民』自忖人多欺人少，包圍、恐嚇、指罵市民，以及損壞市民財物等行為，已經引起社會各界反感。貪求乞食死乞衣（兒），一切嘅恐嚇、清算都係徒然。」神駒亦話：「民心向背，得道多助，失道寡助。」
唔少網民都加入恥笑。「Mui Ying Ling Allard」話：「人多勢眾，老千達當然淆底啦，一向都是欺善怕惡的小人！反骨組織搞清（算）搞到眾叛親離，抵×死，現眼報，大快人心！」
「Wai Chan」就恥笑《熱時》攤位生意慘淡：「×達流淚感慨地（說）：『呢兩年搞書展，最旺係呢一刻喇！』」■香港文匯報記者 何西
