內地首場歌友會 被歌迷熱情融化
香港文匯報訊 許靖韻（Angela）最近可謂是社交媒體的寵兒，前日Angela於北京舉辦首場「《K歌之王》音樂尊享會」，演出現場全場爆滿。作為Angela內地首場歌友會，此次活動同時在網上全程直播，QQ音樂、酷狗音樂、酷狗直播及NOW直播等四大平台合共錄得超過百萬觀眾同時收睇，成績非常理想。
歌友會甫開始，Angela以一身白色修身長裙登場，自彈自唱《白玫瑰》打開序幕。緊接其後唱出《男人KTV》國語版，Angela選唱時原來有一份用心，「國語版嘅原唱係胡彥斌老師，之前參加節目時曾經合作過，講過好希望將來同佢合唱，如果擁有一首由佢創作嘅作品就真係再好不過啦！」Angela今次可謂憑歌寄意，仲講笑叫歌迷記得網上狂tag胡彥斌，實行集氣將願望實現。
之後Angela換咗套銀色閃到爆上衣加黑色漆皮裙，配合翻曲風演繹pop rock味濃的《Girl Friend》及自己作品《琢磨》，唔少觀眾仲起哄點唱其快歌舊作《Ring Ring》，Angela笑謂當然知道大家想一睹自己舞藝，睇怕下次再公開表演都走唔甩要郁兩下。雖然最後未有跳舞，不過Angela為了答謝大家，就翻唱《失落沙洲》同近期內地大熱歌曲《不負青春》，演繹出屬於自己的版本。
觀眾上台比急口令
現場除了北京歌迷，Angela表示沒諗過會有遠至廣州、貴州等地的歌迷飛來支持自己，所以要向現場歌迷大派褔利，邀請了五位觀眾上台比賽玩急口令，又親手送出簽名相片和CD，歌迷顯得相當受落。主持人又問起Angela喜歡歌迷點稱呼自己，Angela說：「其實好多稱呼都好搞笑，不過我最喜歡係叫我『港姐』。」搞笑回應隨即引來網友大讚綜藝感超強！
開騷前怕冇人來
演出最後，Angela壓軸唱出《K歌之王》，成為全晚最高潮，完騷後觀眾甚至唔肯走不停喊encore，Angela事後分享：「呢一刻係全晚最深刻，當我encore再次表演《K歌之王》，今次係全場大合唱，好開心，嗰種感動好難形容呀。」Angela又謂演出前一晚真係好緊張，擔心到瞓唔着，她說：「開騷前就怕冇人來，過程中見到台下有同事面色凝重，又擔心係咪直播有問題，結果係因為佢俾現場氣氛感動到唔識反應。我出道了八年，走到今日有屬於自己的歌友會，有過百萬收看率，我真係好感恩，好激動，俾大家的熱情融化了。」