梁振輝 香港資深出版人
婷婷和輝仔結婚兩年，明年初將迎來他們的第一個愛情結晶。某天，公公、婆婆到訪，坐下不久，大家已把BB未來的養育問題「擺上枱」了。
奶奶：啱啱播完嗰套電視劇《BB出世了》收視爆燈，周度都有人講，你哋都應該有睇㗎喇！
婷婷：有呀奶奶，仲畀咗好多啟示我哋第日點樣去湊B㖭！我睇照跟應該都唔會衰得去邊啩？
奶奶：家嫂，咁講即係你哋唔會接受我以前嗰套湊仔方法喇！喂，話晒我都湊大幾件個噃！
輝仔：阿媽，尊重歸尊重，你嗰套out（過時）㗎嚹！講到點湊，都係畀番我哋自己決定好嘞！
婷婷：奶奶，而家個世界唔同以前，嗰時冇咁多乜細菌物細菌，你點湊都得喇！如果而家唔執到正或者睇少陣，個B咪出出入入醫院囉！
奶奶：有冇咁嚴重呀？就係因為你哋呢班父母緊張過頭，咪搞到啲BB冇晒抵抗力囉！
老爺：開講有話，天生天養，郁啲就緊張成咁；唔好話我講衰嘢吖，我諗出出入入會係你哋噃！
婷婷：老爺奶奶你哋唔使擔心，我哋會集思廣益，同個B做好人生規劃，湊到佢至正咁話喇！
老爺：話時話，新聞報道今期DSE有大學收咗個十三歲細佬哥，好威威呀！
奶奶：如果我哋個B第日學到佢咁，就家山發嘞！
老爺：咁就真係要睇下點樣「擺」佢上去至得嘞！
輝仔：我話咁早將個細路「擺上枱」未必係好事！
婷婷：我第一樣嘢就諗到，呢個細路咁就冇咗一個可貴嘅童年，第日點補都補唔番嘅！
老爺：咦，睇落好似唔係將佢「擺上枱」，而係將佢「擺上神台」，仲講緊係高級學府嗰隻㖭。學嘢可能都冇問題，但同人溝通就......
輝仔：仲有呀，而家班大學生真係好玩嘢㗎！
婷婷：喺「迎新營」度咪就已經玩到「裙拉褲甩」喇，所以見你細細個入到大學唔玩你至奇！
奶奶：唔係咁恐怖呀嗎？
輝仔：連跳幾級仲越埋級，會唔會「谷」得勁過頭呀？如果第日去唔到預期嘅效果，個細路未必承受得起，到時跳樓都有之！啲父母就話唔識啫，連校方同大學都癲埋一份，就真係笑話囉！
婷婷：屋企人就虛榮心作祟，校方同大學就博出位囉！我哋都係用循序漸進式畀個B學習好嘞！
奶奶：話又唔係咁講嚹，你老豆賣鹹鴨蛋，你兩公婆都係做個文員仔；你哋咁嘅出身，如果第日個B「擺得到上神台」，咁咪可以「洗底」囉！
婷婷：洗咗又會點呢？
老爺：唔使成世畀人講「狗肉擺唔到上枱」囉！
「擺上枱」，表面意思是拿出來「談」、「讚」或被人推舉出來，可很多時卻是指刻意把某人相關的事情公開--「評」、「批」，而被「擺上枱」的人事先多不知情，或不願將事情曝光。事情一經「擺上枱」，當事人即處於難堪境地，也好像被推前當箭靶或被擺在砧板上任人魚肉，有被誣害的感覺。現今那多存敵意的「網絡公審」（Internet Judge） --有理無理，人身攻擊，未審先判，就是「擺上枱」造成的惡果。
「神台」（俗寫「神枱」，多讀作「神台4-2」）是個木製直身櫃，用以供奉神靈。能「擺上神台/升上神台」，即是受人景仰、推崇，原意是把人放到很高的位置上。後來，「擺上神台」被視為職場上的一種「權術」--明升暗降，指將某人升遷至一個有名無實的頗高職位。這種做法如同「架空」--暗中排擠，使失實權。這些被「擺上神台」的人，可能是能力衰退的老臣子，目的是騰出他的位置，而所謂高職位只不過是「安慰獎」罷了；又或者是有能力卻不識抬舉的猛將，目的是逼促他主動辭職。
現代人生育少，尤其無甚背景的家庭，不少會把希望全數押注在子女身上，期望一登龍門，聲價十倍，可胡亂「催谷」，只會適得其反。古今中外，如華羅庚、牛頓（Isaac Newton）、愛迪生（Thomas Edison）、林肯（Abraham Lincoln）等不少傑出學者、科學家、政治家，多不是由父母帶大的。對別具潛能的子女，那恰當的、周詳的安排可能是一種障礙。中國人有句老話：
若要小兒安，常帶三分飢與寒
為此，父母不宜太緊張，也勿刻意把子女「擺上神台」，讓他們享受正常的成長過程才是。
如果說「擺得上枱」，就是指某些事物能上正式場合或大場面。廣東人對此會說：
見得人、出得街
狗肉，歷來被視為低等人的食品或在困難時刻為求生的食物。也有說宋徽宗生肖屬狗，民間為了避諱而不敢吃狗肉。基於上述理據，狗肉一般是「擺不得上枱」的，即不能當宴席桌上的一道菜式，於是流傳了以下的講法：
狗肉擺不上桌/狗肉上不了（正）席
一如：
笨鴨子上不了架/癩狗扶不上牆
後人以此比喻質素太差，不能扶持的人；也比喻某人沒本事或出身不好，成不了大事或不能登大雅之堂，暗喻低下層的須老老實實的停留在較低的層次上。無可否認，在書香門第成長的一群，或多或少可收潛移默化之效；可要是不思進取，所達水平可被任何人超越。從自身經歷，筆者可告訴大家，門第只是區分起步的高低，不會決定一生的成敗，是故毋妄自菲薄，「笑到最後」的將會是那些努力不懈的人們。
「粵語」在好大部分人（包括語文學者）的眼裡，是粗鄙且缺精蘊的方言，如「狗肉」般都是「擺不上桌」的。筆者只可說，這些人只是沒充分了解粵語和沒作出深入的探究而已。
【專欄簡體版】https://leoleung2016.wordpress.com/