■有網民上載了警員委任證的式樣。fb圖片看圖說故事喺fb人人喊打，但起碼都叫做有圖吖，講明有意參加今年立法會九龍西補選嘅小麗老千（劉小麗），就連圖都唔使，話自己俾人「跟蹤」，仲話警方都係監視者之一，有人更向佢出示印有「特遣隊」字樣嘅委任證喎。唔只冇圖冇真相，仲突破智商下限。有警員就話，自己當咗差三十幾年，都冇見過委任證會印「特遣隊」字樣，仲寸佢身為臨時演員都係演員，唔該老作都專業啲吖！
監視者委任證印「特遣隊」？
反對派扮受迫害博同情就梗㗎啦，但唔該都專業小小吖！小麗老千近日喺接受傳媒訪問時，話自從7月中，佢街站旁邊就經常有「可疑人士」監視，甚至跟蹤佢去到辦公室，仲話喺「可疑人士」之中，有一類「戴著（着）無線耳機、身穿Polo恤」，當佢詢問對方身份時，對方就會「出示委任證」，「有一次委任證上印有特遣隊字樣」云云。
佢班盲粉當然信到十足十啦，仲瘋狂侮辱警方，例如「Samuel Ngai」就爆粗：「D（啲）×街公安，咁得閒攪（搞）政治，做（唔）番（返）政治中立。」「Victor Ma」更聲言：「香港愈來愈多有牌黑社會。」
網民鬧爆同釘書林無分別
不過，有曾任職特遣隊主管嘅人睇完就忍唔住出聲：「佢係咪神經病啊？我做咗幾任特遣隊主管唔會有特遣隊呢三個字出現喺我嘅委任証（證）上，作嘢越作越離譜，故意誤導一啲無知巿民，同釘書林（聲稱被『強力部門』在鬧市被『擄走』的民主黨成員林子健）有咩分別？」
「Kai Wing Fong」亦現身說法：「我當咗三十幾年差，都未聽過委任證有（特遣隊）三個字，吹水過籠（龍），露出馬腳。」「Ho Kenny」也批評：「小麗老千都白癡，warrant card有特遣隊，有無巡邏小隊，特別職務隊，衝鋒隊呀？咁咪成日要轉？小麗老千嘛，老千就是靠呃人，講大話就梗架（㗎）啦！」
「Ken Chan」就揶揄：「我有時都會帶（戴）耳機和著（着）polo喎......我幾時做左（咗）警察都唔知既（嘅）......哈哈！」「Bun Mok」則笑言：「我都周不時係（喺）香港見到美國隊長係（喺）香港徘徊！足以證明美國間諜入侵中國！」
「Michael John Sum」就回帶話：「佢上次話捐半份糧但冇做到，（追蹤佢嘅可能係）佢啲債主街坊，準備劈佢掛（啩）。」「Ho Suki」亦道：「自抬身價，信你果（嗰）個都智障，又話捐人工？找數未呀，大嬸？」「Sacy Cheng」狠批：「呢D（啲）大話精講大話唔使本，又唔做吓資料搜集，仲話係老師喎。佢遲D（啲）可能話有錦衣衛用血滴子攻擊佢添（𠻹）！」■香港文匯報記者 陳川