好耐都無睇過一齣笑到碌地、劇本玩味極重的喜劇。終於《賤偵Madam摷公仔》（The Happytime Murders，圖）搵嚟演喜劇一定最掂檔的瑪莉莎麥卡菲 （Melissa McCarthy）撐場爆肚玩即興。拍開正路戲的導演伯恩漢臣（Brian Henson），竟然夠膽將布公仔同真人鑽入黃賭毒三級私竇去查案，顛覆其公司旗下布公仔作品建立的正面形象，史無前例將《賤偵Madam摷公仔》拍成一部兒童不宜、有性有暴力，同埋影射緊現實社會，被邊緣化的社群、種族歧視以至貶抑女性問題的瘋狂喜劇。
今次導演認真大膽，將《賤偵Madam摷公仔》內容填滿黑色幽默同成人笑料，以為布公仔電影必定適合小朋友睇，當演員一開口時，大部分的對白或出現的場面絕對扭轉布公仔可愛、有教育性的一面，可能由細到大睇開《芝麻街》（Sesame Street）關係，所以對呢部電影覺得好震撼。
電影勁在動用咗超過125隻獨一無二的布公仔拍攝，全部都係由行內頂尖的布公仔設計師細緻打造，無論服飾、髮型以至化妝都一絲不苟。講到最架勢就一定係布公仔主角飛機，因為團隊特別幫佢製作咗6副約4呎高的身軀，同埋8對可以互換的手臂，用於各種唔同場面，譬如食煙、打交、揸槍等等。若要數最爆最抵死最史無前例的一場戲，必定係飛機同女布公仔珊渣的性愛場面。為咗令觀眾睇得更過癮，導演拍攝時堅持採用白色噴彩帶，營造高潮爆發的特殊效果，佢更笑稱每一鏡都需要用到兩罐噴彩帶才能完成。■文︰逸珊