吳錦雄同張宇添搞「純玩兩天團」，標榜「一次過去晒兩個基建」，即係港珠澳大橋同高鐵香港段。 fb圖片吳錦雄張宇添「霸頭位」 搶開高鐵大橋內地團
嗱，香港反對派呢，除咗識派蛇齋餅膄坏~，仲好識走位㗎！高鐵香港段同港珠澳大橋未起好，佢哋就喺度話項目點樣超支點樣唔好、內地幾咁「危險」；起好咗嘞，成班反對派就仆都仆唔切咁搞高鐵團、大橋團，帶街坊遊覽名山大川，擁抱粵港澳大灣區共同家園。唔少網民批評政棍一招走天涯，為反對而反對，但最後「身體都係好誠實」。有人更揶揄：「面皮薄啲都做唔出，無恥真係天下無敵！」 ■香港文匯報記者 陳庭佳
工聯會新界東辦事處總幹事鄧家彪噚日喺facebook發帖，踢爆民主黨沙田區議員吳錦雄同社區主任張宇添，將會喺下月中搞個「純玩兩天團」，去「歎盡中山順德私房菜」同埋遊覽「佛羅倫斯小鎮」，仲雞乸咁大隻字標榜「一次過去晒兩個基建」，出發會經港珠澳大橋，返嚟就坐高鐵直達西九龍站，即係體驗埋「一地兩檢」咁話。
咪住！民主黨唔係好反對「一地兩檢」嘅咩？鄧家彪就大「讚」兩人：「都話民主黨貼地，急民所急，想民所想！一次過去晒兩大基建，擁抱大灣區一小時生活圈。」佢仲問公民黨搞唔搞埋一份𠻹。
鄧家彪：玩晒兩項基建
佢其後再發帖，笑道：「做地區真係講心思又要貼地。其實我都搵旅行社做緊報價，諗住搞一個大橋團，俾（畀）街坊身在橋上感受世紀工程的偉大。點估到民主黨咁有創意，『一次過去晒兩個基建』 。話時話，你哋用邊間旅行社？介紹畀我哋啦！」
陸頌雄回帶批杯葛開幕
工聯會立法會議員陸頌雄就玩回帶：「睇返記錄：民主黨喺2009年投票反高鐵（高鐵香港段撥款）；2016年嗰個立法會議員鄺俊宇亦講過『根本唔應該起高鐵』；至於高鐵（香港段）開幕禮，民主黨更加齊齊杯葛。或者，歲月會改變一切，就算當年嘅反對派，都會變成擁護者？」
佢仲捉到民主黨錯處，留意到佢哋張海報用咗台灣高鐵（700T型）張相，而唔係和諧號、復興號或者動感號，「似乎唔太專業噃？」
郭偉强譏反到底又霸頭位
工聯會另一位立法會議員何啟明都抽水：「（民主黨）這個行程不錯，搞到我都想跟去??！」同樣係工記議員嘅郭偉强就直線抽擊：「反到底又霸頭位，即刻現形。」
事件主角之一吳錦雄喺回覆傳媒查詢時就直認，自己因為搞呢個團，而俾黨內「提點」咗幾句。佢話民主黨有「提醒」過議員「盡量唔好搞呢啲團」，黨內更加有人「提醒」佢應該「低調處理」。不過，黨內大佬唔係叫佢唔好搞喎，而係叫佢哋搵自己嘅「衛星組織」，例如搵啲「居民協會」嗰啲嚟主辦喎。
佢又辯稱，民主黨喺立法會已經表達咗反對意見，而呢啲基建已經上晒馬，居民都想見識吓，「民主黨都反對東大嶼填海，唔通第日填完之後又唔去咩？」
其實「身體誠實」嘅點止吳錦雄一個吖！香港文匯報早前就踢爆前「街工」葵青區議員周偉雄喺區議會反「一地兩檢」，結果咪又係「一次過去晒兩個基建」？
facebook專頁「泛民可恥行為事件簿」仲踢爆埋「新民主同盟」大埔區議員周炫瑋，亦會喺聖誕節組團帶街坊去貴州省旅遊，行程包括去黃果樹大瀑布、荔波小七孔呢啲大路嘢，最特別就係一直喺地區反高鐵嘅吽A竟然安排街坊去廣州南站坐貴廣和諧號動車去貴州，同埋安排佢哋享用「高鐵盒飯」𠻹！
周生乜咁支持高鐵呀突然？其實佢都係學黨內大佬咖喱飯（范國威）啫，事關港珠澳大橋未起好，咖喱飯都係咁反對，到起好咗都係忍唔住上橋打卡，事後仲死撐自己「監督大橋」！
專頁就話嘞，既然咖喱飯可以「監督大橋」，咁周炫瑋做細嘅都可以「監督高鐵」啫！
查實周炫瑋都有鋪帶街坊去內地旅遊嘅癮㗎，好似喺上年9月，佢就同街坊同遊江門、中山兩日一夜。