地球上係咪已經冇嘢可以阻止到民主黨個許智峯（峯鴿）郁手郁腳？繼搶保安局女EO電話、喺立法會同區議會撞保安同議員同事，許智峯前晚係威係勢咁喺facebook度貼咗段自己質問中西區區議會交通及運輸委員會主席陳財喜嘅片，佢質問嘅內容就冇頭冇尾唔知到底係咩，但就好清楚見到佢最少三度出手拉住、捉住陳財喜，仲伸手攔住唔畀佢走𠻹。大家話晒都係服務市民嘅議員，叫許智峯文明啲係咪真係咁難呢？
許智峯前晚喺fb貼咗段30幾秒嘅片，想喺30幾秒知道前因後果就冇乜可能㗎啦，咁許智峯想大家睇咩呢？咪就係佢搵人幫手全程攝錄，自己就action埋位去質問陳財喜點解唔批准討論沙中線工程嘅文件囉。
自己放片「證有做嘢」
片中所見，許智峯不斷攔路質問陳財喜，仲一再出手拉拉扯扯，入到鏡嘅已經見到最少三下。陳財喜不斷講「你可唔可以唔好......」但每次未講完就俾許智峯打斷繼續質問，而對方已經講咗︰「𠵱家唔想答你住。」係囉，你鍾意做show拍片扮有做嘢啫，人哋一定要陪你咩？有咩留返開會講啦。
唔少網民見到許智峯又郁手郁腳，都好睇唔過眼。「Ricky Wong」話佢「無賴」，「Edward Sung」就話佢「又博出位」，「Chuong Chuong Chuong」批評︰「佢成日以為笑住就做乜都冇問題，捉手捉腳咁，衰格！可能佢真係好想坐監，俾（畀）個機會佢啦！」「阿泳」亦質問︰「許智峯為民主！你老×為自己咋華（啩）！拍片為選票！香港俾你玩殘啦！垃圾！」
有啲人就覺得許智峯再一次對年輕人作出錯誤示範，「Yuko Tai」怒斥︰「唔明點解仲可以做議員，D（啲）學生有樣學樣！ 要討論問題，表達訴求要用咁嘅方法......真係你睇下『泛民』嗰班長毛、李卓仁（人）......個個都係用呢種方法先懂得同人對話！」「Way Yin」亦話︰「佢根本覺得『用武力達到目的』是正常的 。他是人格和認知有問題 。」
「LW Chan」就索性問返鴿黨主席胡志偉︰「呢隻癲鴿峰（峯）越嚟越癲呀！身為主席嘅胡志偉係咪應該要出嚟講下（吓）嘢呢？」上次許智峯亂噏話民主黨畀錢支持佢上訴搶保安局女EO單嘢，胡志偉澄清完都冇話過許智峯半句啦，呢壇嘢吨S點會出聲？
■香港文匯報記者 甘瑜