立法會財委會主席陳健波話邊個反對填海就係歷史罪人，反對派諗住喺議會用盡一切方法都要批鬥佢，但陳健波未瞓低，「民主派會議」召集人毛婆（毛孟靜）就已率先中箭。近日有風聲傳出，話反對派喺陳健波講嘢當日已經有共識要郁佢，但身為召集人嘅毛婆一直無統籌具體行動喎，毛婆之後即刻喺facebook話係「fake news（假新聞）」（下圖）。
邊個講法先係真，外人好難知，但傻嘅都知傳媒咁引述，講嗰個人一定唔會係建制派議員，而係反對派內部流出嚟。毛婆到底有幾乞同路人憎，睇怕唔使講都知。
「民主派會議」召集人由反對派「四大板塊」搵人輪流擔任，上月開始輪到毛婆擔任。此前，Now新聞台嘅《政情》節目就爆料，話個位本來由公民黨嘅陳淑莊做，但因為佢涉及嘅「佔中」案喺今個月開審，要由「議會陣線」頂上，而經商討後就決定由毛婆做。
同路人不滿無統籌批鬥陳
但係，有反對派中人當時都覺得大鑊，認為佢鍾意「個人表演」，未必夠「抵得諗」去做對內對外嘅溝通工作。有人曾經諗過由同屬「議會陣線」嘅陳志全頂替，但對方報稱所屬嘅「人民力量」經常同主流反對派唔妥，費事尷尬而拒絕，結果都係毛婆做。
《政情》早幾日又爆料嘞，話反對派當日聽到陳健波講填海嘅言論，已經有「共識」要發炮還擊，但毛婆就一直冇統籌具體行動，搞到要由公民黨郭家麒先行出招，喺財委會針對陳健波提不信任動議，毛婆之後先宣佈要求喺內會討論事件。
節目仲引述「政界中人」話毛婆唔熟書，因為財委會嘅嘢根本唔適宜喺內會討論，又希望呢位新任召集人「盡快進入角色」，協調「民主派」打面前「硬仗」喎。
咦，咁樣講法，咪即係連自己友都寸毛婆未瞓醒？
報道出咗街 話係流料遮醜
毛婆喺節目出街後即刻出po（帖文），學晒美國總統特朗普口頭禪，話呢單係「假新聞」，由反對派當日有共識、佢無做統籌、郭家麒先出招到佢跟人口水尾都係「假」嘅。至於有「政界中人」叫佢「盡快進入角色」，佢就笑兩嘢算數。
《政情》之後亦都喺網站登咗毛婆回應話，反對派當日並無達成共識，無共識係唔會有具體行動，至於喺內會同財委會跟進陳健波言論係佢先提議嘅，話佢無做統籌並不符事實喎。
姑勿論係啲風聲定係毛婆嘅講法係真嘅，但毛婆成為「民主派會議」召集人無耐，就有自己友咁樣「做」佢嘞，睇嚟妘ㄜn諗吓呢個位坐唔坐得暖！
■香港文匯報記者 鄭治祖