■廢陶表面向杜汶澤道歉，實質譴責對方武力威嚇。 fb截圖一次補選，可以引發幾多場反對派「捉鬼」反面大戰？社民連廢陶（陶君行）日前喺網台節目話杜汶澤「突然本土」，仲搵埋人哋老婆可以喺內地搵食嚟講，暗示杜汶澤係「鬼」，搞到杜汶澤亦嬲到話要「打×死」佢。件事嘈足幾日幾夜，連自己友都行出嚟插廢陶幾刀，前日仲係唔肯道歉嘅廢陶，噚日終於跪低道歉，但就想攞返個尾彩，叫杜汶澤收回恐嚇言論，仲企埋喺道德高地，話對方係用威嚇形式迫人就範喎，越講越似譴責。不過杜汶澤就冇理到對方嘅要求，只係話既然廢陶肯道歉，佢亦都當粉筆字抹咗件事喎。咁又係嘅，廢陶道歉得就係認咗低威，咪睇吓班反對派幫唔幫你主持公道囉。 ■香港文匯報記者 馬壯
廢陶攞埋人哋老婆出嚟攻擊杜汶澤，件事嘈到噚日終於似乎收到科，但喺正式跪低之前，廢陶都仲係頂咗一陣腥風血雨。其中，反對派導演畢明就喺報紙寫咗篇文，連「議會陣線」立法會議員毛婆（毛孟靜）都有「些牙」（share）。
同道撰文寸「豬隊友」倒米
畢明喺篇文度話，「政治、選舉、之前之後之中，從來抹紅抹黑，抹藍抹黃，但抹到七彩最重要還是是非黑白。」鬧爆反對派自稱「名門正派」，但有錯有笨有失誤，一樣冇得姑息，仲話反對派與其做「民主爛仔」，不如做民主小販，應該要落區做實事。嘩！自己友都咁鬧法，反對派真係唔自我反省都唔得啦。
畢明仲明寸廢陶係「豬隊友」，衝出來倒米，認為佢質疑杜汶澤「忽然本土」，係言辭輕佻，連人哋老婆都「辣」埋，就係低級又殘忍，「那位陶先生，絕對欠杜汶澤一個正式的道歉。」
縮沙表「歉意」 暗責被威嚇
唔知係咪因為比自己友踩咗太多腳，廢陶終於頂唔住，噚日跪低同杜汶澤道歉。佢喺facebook話就自己對杜汶澤同佢老婆田蕊妮言論「深表歉意」，但同時要求杜汶澤收回有關暴力襲擊嘅言論，仲話杜汶澤講嘅嘢涉及刑事成分，更以威嚇的方式，迫使他人就範咁話。佢仲扯到唔想香港人喺表達政見時，時刻受到武力威嚇而唔出聲。嘩！到底呢個係道歉定譴責呢？
其實呢件事，廢陶信口開河、杜汶澤出言恐嚇都係事實，但似乎要反對派支持者分清是非黑白真係幾難，唔少人都喺廢陶度留言鬧爆廢陶，好似杜汶澤講咩都冇錯咁。「Moon Cheuk」就鬧：「真係肉酸，講野（嘢）咁難聽，極之令人反感，杜生拍野（嘢）帶比（畀）香港人歡樂，你就話人戲子××，老婆都比（俾）你講埋，成個演藝圈一次過比（俾）你侮辱晒，仲有你依（𠵱）篇野（嘢）吾（唔）係真心道歉。」
網民批先撩者賤無誠意
「Ken Cheung」亦話：「道歉要人收番（返）言論，這樣道歉真係完全無誠意。係咪人哋暗示你『投共』都得，唔可以反擊？被人屈唔嬲就假。所謂涉嫌不當言論是因果關係。先撩者賤，有無聽過？以後請必須慎言，自然不會有所謂不當言論。」