■仲有年幾先到立法會選舉喎，咁快就吹定風告急？ fb截圖唔知係咪因為舊年輸咗兩場立法會九龍西補選輸到心慌慌，家吓反對派未有選舉就開始落閘。繼之前有公民黨余若薇話社民連長毛（梁國雄）唔受控制，擔心佢輸埋將來或會舉行嘅新界東補選之後，《蘋果日報》噚日亦發功幫鴿黨（民主黨）林卓廷喺2020年嘅立法會換屆選舉造定勢，將近排鴿黨新界東有59人因為不滿林卓廷退黨一事，分析成佢哋對林卓廷爭取連任嘅影響，仲喺文度提到呢班人出選「旨在拉林卓廷落馬」、「影響『民主派』整體選情」嘅「陰謀論」喎。唔少反對派支持者自己都頂唔順呢番老調，反問佢哋︰「又鎅票論，又內鬼，又×票，又抹黑，最後怪選民，又想loop（重複）多一次？」 ■香港文匯報記者 何西、甘瑜
鴿黨新界東支部早前有成59人退黨，包括5個區議員，佢哋炮轟民主黨立法會議員林卓廷人格卑劣、喺黨內隻手遮天。
《蘋果》向來重視鴿黨就係人都知，噚日《蘋果》就出咗篇文，話呢59人因為同林卓廷「在地區資源分配上不咬弦」而退黨，「對林卓廷在2020年新東競逐連任有影響」喎。
仲有成年先立法會選舉，《蘋果》咁快吹定風幫林卓廷告急，講到尾又係為咗議席囉！
區鎮樺揚言鎅15000票
篇報道就訪問咗退黨嘅大埔區議員區鎮樺，而呢個區鎮樺亦掏心掏肺咁分析話佢哋有影響力，可以拉走萬五票咁多㗎。《蘋果》當然都食住個勢上，話「政圈有陰謀論認為聯盟（退黨班人）2020年出選旨在拉林卓廷落馬」、「（聯盟）出選或會影響『民主派』整體選情」，再話區鎮樺「笑稱」︰「任何選票都係選民嘅。」
咁嘅報道，當然引到啲人鬧爆區鎮樺嘅。「Tsz Chung」怒斥︰「『任何選票都係選民嘅？』區鎮樺點解區選話人鎅你票呢？契弟！......『至少可拉走15,000票支持？』唔知話你天真定白痴好！保得住你自己先講啦，垃圾！」「Maiko Irie」就簡潔地鬧︰「界（鎅）票正×街。」
不過反對派呢啲催票伎倆真係仲老土過粵語殘片，你唔悶班網民都覺得悶啦。「Wong Tsz Ming」就話：「又鎅票論，又內鬼，又×票，又抹黑，最後怪選民，又想loop（重複）多一次？」「Terence Li」亦認為︰「『泛民』真係沒有不分裂的理由。」
網民譏《蘋果》幫倒忙
「Jeff Li」批評《蘋果》又幫倒忙︰「繼續×票就贏架（㗎）啦？試下（吓）囉又，如果林生真係輸左（咗），記得×《蘋果》呀，咁快幫你告急咪即係倒票落海。」
「陳大民」就認為呢啲咁嘅風向反映鴿黨根本冇反省過︰「幾十個自己友反抬（枱）都唔需要反省吓喎！」「Sim Leung」就反問唔通退黨仲要幫你抬轎：「咁人地（哋）成班唔妥你，唔通仲讓路俾（畀）你呀？個位你嫁（㗎）？」「Agostinho Chok」批評︰「高大衰（林卓廷）人格有問題，眾叛親離仲想連任，做左（咗）垃圾『已完（議員）』以為自己大曬（晒）又無任何政績及對社區做過任何事，被淘汰係必然事。」