■陳展浚同姜新華個易拉架同楊岳橋嗰個簧I一齊，陳自己就喺附近同市民交流。 張美雄fb圖片今年有區議會選舉，一班想𢱑議席嘅人又浮晒出嚟宣傳，自己名氣唔夠唔緊要，將個易拉架擺埋現任立法會議員隔籬，咪方便又快捷囉。有康城領都居民近日就見到「將軍澳民生關注組」個陳展浚同姜新華嘅宣傳易拉架，同公民黨議員楊岳橋（戇橋）嗰個擺埋一齊，而陳展浚本人就戙喺附近同市民交流，有市民就影相報料畀楊岳橋，楊岳橋回覆市民時即刻劃清界線，話嗰兩條友都唔係公民黨成員，「亦從來沒有獲授權以我的名義做地區工作」，真係咪話唔瘀。
黐戇橋易拉架博懵宣傳
西貢區議員張美雄噚日喺facebook度出文出相，相入面就見到陳展浚同姜新華個易拉架，黐住咁擺喺楊岳橋個易拉架隔籬，而陳展浚本人就棟喺附近同市民交流，唔清楚黨派關係嘅市民，真係分分鐘認錯佢哋牌頭都唔定。
張美雄就反問︰「『將軍澳民生關注組』的姜生（現任領都業委副主席）同陳生，點解要屢次冒認公民黨名義去做野（嘢）呢？你地（哋）認為市民淨係透過『泛民』/建制既（嘅）標籤去投票嗎？」
張美雄仲貼埋楊岳橋個回應出嚟，有市民影咗相報料畀楊岳橋，楊岳橋就即刻劃清界線，而個市民亦話︰「這群人經常盜用貴黨名義作自我宣傳。」
事實上，「將軍澳民生關注組」真係好鍾意黐埋楊岳橋度㗎，其中「將關組」成員葉嘉榮舊年先俾人揭發擅自喺自己海報上印埋「楊岳橋議員辦事處」幾隻字，楊岳橋當時知道後亦都即刻劃清界線，強調冇同呢個組織合作。
「將關組」就話曾經幫過公民黨助選，但以後會小心啲處理喎，唔知今次又點解釋呢？■香港文匯報記者 甘瑜