民主黨「釘書健」（林子健）前年聲稱俾內地「強力部門」派人「擄走」，最後被控報假案，以為咁就夠幻海奇情？未算！當日陪對方開記招、入廠兼夾上埋人哋屋企食飯嘅民主黨立法會議員林卓廷，喺噚日對方上庭第三日，旁聽席都仲未見到佢嘅身影！究竟去咗邊？有北區居民就周到佢情願喺上水寫揮春賀吓仲有差唔多成個月先到嘅新歲，都唔撐釘書健呢位「真兄弟」。有網民就不滿反對派見有水抽就仆唔切咁出嚟，抽錯水就玩失蹤。
又係嘅，利字當頭，林卓廷玩割席呢壇嘢，再次顯示反對派啲人情真係可以薄過0.03！
林卓廷呢幾日真係收西瓜收到停唔到手，呢頭全國政協副主席梁振英仲有大批網民叫佢蒲頭撐吓釘書健，嗰頭又有北區居民叫身為區議員嘅妢d好區務，好似上水前晚大塞車，「Kevin Tin」就喺facebook嘅北區討論區留言：「石湖墟議員唔理石湖墟，又話要做返好上水，𠵱家塞到咁，林卓廷你去咗邊？」
一邊係情義，一邊係飯碗，林卓廷就梗係揀後者啦。噚日，「Peter Tse」就影到佢朝早喺上水石湖墟街市前擺檔寫揮春，「場面冷清清，但都唔去法庭支持釘書健。說到天花龍鳳之後，冇着數，6呎4（指林卓廷）睬你都傻！」
佢仲講到好多騙徒都係最初講到天花亂墜，之後就昆人一大筆，政界方面亦都唔例外，「政客的所謂民主、所謂守護、所謂愛，原來不過是一個個政治騙局」，好似林卓廷同佢個黨友「奸人堅」（尹兆堅）咁，不斷炒作UGL事件，講完一輪「公義」、「真相」之後都係抬出「眾籌」兩個字，最後籌到兩球幾嘢，但就冇做到任何「成績」囉。
抽錯火水全黨玩失蹤
facebook專頁「泛民可恥行為事件簿」亦都贈吓慶，整咗張圖寸林卓廷：「記招齊人，醫院同行，法院唔見人！兄弟，係拿來利用同出賣的。」
「Ken Chan」就好似看破世事咁：「大難臨頭都各自飛啦，上次幫佢幾英吖，今次幾雞吖，陪佢出庭仲死，梗閃啦。」
「Waiyin Luk」亦都話：「見有水抽就全體仝人都出嚟獻世，之後見抽錯水就全世界都玩失蹤。」
落區寫揮春雖然可以避過去撐釘書健呢位「真兄弟」，但就避唔過北區居民嘅怒火囉。
「Cheris Liu」話：「寫咩揮春呀，有時間搞好上水啦，單車泊到一街都係，又周街垃圾，民生都未搞得掂。」
搞好北區民生更實際
「Johnny Ng」就「建議」：「佢應該夜晚塞車時去上水廣場附近寫嘛，睇下（吓）到時啲人想佢寫乜出來。」 ■香港文匯報記者 陳庭佳
