■戇橋（右）鞠完躬今日又繼續做「政治演員」，黨紀？食得㗎？ 香港文匯報記者梁祖彝 攝有人惡搞《西遊記》，話呢個故事證明有個豬一般嘅隊友，一定會令成個團隊上西天，之前唔少反對派中人已經示範過點樣一個累全家，近日公民黨黨魁戇橋（楊岳橋），就再次證實咗呢個「理論」：佢為咗討好「港獨」分子，原本要喺前日嘅立法會大會話要提「檢討單程證」制度嘅動議，結果no show，成為全城辱罵、恥笑嘅對象。鬧吓鬧吓，有人就開始質問公民黨點解「有法不依」、唔根據黨紀處理佢；有人質問佢嘅助理，以至其他反對派議員點解冇提佢；有人更加話呢件事證明反對派議員喺議會根本毫無作用，叫佢哋「一辭（職）以謝天下」咁話喎。 ■香港文匯報記者 陳川
戇橋喺出事後解釋，話佢趕唔到返去會議廳，係因為掛住睇政制及內地事務局局長聶德權嗰個有關國歌法嘅記者會直播喎。不過，大家當然唔受兼夾恥笑同鬧爆啦！佢嘅支持者，就即刻齊齊為佢護航。
好似「Didi Anna」咁，就懶係「洞悉世情」咁留言話：「明白嘅......（檢討單程證制度）係一個有危險的議題，好容易被對家保皇黨人數眾多之際，食住上通過加額仲大鑊，......今回不是一個好時機去討論這個議題...待適當時機才再爭取吧！」
寸爆護黨智將：不如坐以待斃
「Shirley Wong」就做咗戇橋肚裡條蛔蟲，話戇橋缺席係因為怕建制派「騎劫」動議喎：「騎劫後已不是原貌，一定唔夠對家人多勢眾，玩缺席更上策。」
不過，呢啲咁有智將feel嘅言論，梗係被恥笑啦！「Donald Tsai」就揶揄：「笑×死，咁以後飯民乜都唔好做啦！橫掂投票又輸，提議案又俾人修訂！」「Albatron Ka」亦話：「反正都係唔夠人啦，多一個吾（唔）多少一個吾（唔）少，不如飲夠（引咎）辭職以謝罪天下啦！」
「陳麒麟」就進一步去挑埋公民黨機，佢上載咗「公民黨黨員行為守則及紀律程序」，質疑公民黨點解「有法不依」，唔對戇橋採取紀律行動：「各議員黨員須盡力及適當地履行其在議會中的職責，遵守本黨制定之有關議員手冊，並不得無故缺席所屬議會的會議或其所屬議會屬下委員會的會議。......各議員黨員若違反上述第6.1.至第6.4.項的規定，會被視為違反紀律。」
唔少人就質疑戇橋班助理當時做緊咩。「Charlie Kok Li Yeung」質疑：「班議助都係睇緊直播？定訓（瞓）晒覺？」
原來已犯黨規 健吾借勢方丈
經常批評傳統反對派而被佢哋嘅議員助理視若仇讎嘅電台節目主持健吾（葉鍵濠），今次就有仇報仇，發帖鬧：「佢班議助，剩（淨）係（喺）網上同WhatsApp group 瘋狂唱我怨毒，收左（咗）共產黨錢。今次點解唔提個老細去開會呀？係特登唔提丫（吖），定係覺得開會唔重要呀？」
有人就燒埋其他反對派議員，例如經常借所謂「反赤化」嘅「新民主同盟」議員咖喱飯（范國威），當日係打算就戇橋嘅動議提修訂嘅，但好明顯佢當時冇關心到戇橋去咗邊啦。「Larry Yik」就話：「（反對派）其他人也有責任，不要各自為政，一盤散沙。」
「成班茄哩啡 等選舉仆啦！」
「Andy Tang」則指：「根本成班夾埋做大戲，當你條友自己掛住睇直播，請問啲助手、黨友及其他飯民點解唔會提早叫定佢落嚟呀？」
「Kin Leung Cheung」更爆粗道：「所以李卓人點解會輸係有原因架（㗎）！你地（哋）班垃圾泛民即管繼續咁樣吖，莫講話2020年喇，以後立法會選舉你地（哋）分分鐘輸到仆晒×呀！」
戇橋嘅支持者，以至其他反對派嘅選民，當然亦逃唔過被批評嘅命運。「Cheung Samuel」曲道：「楊岳橋沒問題，投票比（畀）佢選民有問題之嘛。」
「Cage Nk Yim」就話：「垃圾渣滓議員，當然就有喜愛渣滓垃圾嘅選民。」「Connie Tse」就揶揄：「我覺真係要整個智力測試，過到先可以做選民。」
