喺網絡發達嘅今日，斷章取義甚至完全虛假嘅消息越來越多，唔少人都經常跟車太貼炒晒車，但人類總係犯重複嘅錯誤嘅。話說中國移動近日送兩款利是封畀客戶，有人就喺fb發帖鬧其中一款竟然係「死人藍襯白花」喎。身為立法會議員嘅毛婆（毛孟靜），連求證吓都無就照出地球post嚟share，佢成班支持者梗係留言又話咩「大陸化」之類嘅廢話啦。原來，嗰款利是封其實係紫色襯銀邊囉，連發帖者都要喺帖度say sorry，毛婆今次又衰咗。
話說報稱係日語教師嘅「Louis Tam」發咗個話係「轉貼」嘅帖，內容係佢手執一疊「藍色」嘅利是封，文中就話：「中移動搵邊個設計利是封嘅企出嚟，我保證唔打死你。新年流流死人藍襯白花。大吉你個利是。俾啲長輩見到肯定即時同你開年。」
見寫「中移動」即些牙
大概係見到「中移動」3個字，毛婆梗係即刻share（些牙），仲形容利是封隻色係「靈堂藍」。一直係反對派打手嘅專欄作者陶傑，亦都喺伭b轉發，話「藍白兩色，在中國國情之中，是面對三鞠躬的靈堂雙色之絕配。用於農曆新年的利是封套，不如包裝帛金合適。還是『中国移动』對豬年有某種凶氣移動的先知先覺的預感？」
反對派班支持者當然盲目附和啦，又話中資「品味獨特」，有人更借題發揮話因為回歸後先會咁樣云云。不過，有啲網民就不以為然。「Esme Tang」話：「派比（畀）你又唔收你錢，唔鐘（鍾）意咪唔好用，有咩須（需）要小事化大。」
「Eric Chang」笑言：「其實我注重內在多D（啲）。如果你封一仟（千元）一封，你比（畀）白色利是封我都會收架（㗎）。」
不過，唔少收過呢款利是封嘅人就話，嗰款俾人話嘅利是封，其實係紫底銀邊，唔係藍底白邊喎！
疑遭改圖 陶傑亦中伏
fb專頁「李懂媽」就睇唔過眼，踢爆張相係造假：「我一早收到好多包中移動嘅利是封，每一包都係一半紅色一半紫色，我相信喻（寓）意係大紅大紫，合埋就係一朵富貴花（睇落似係牡丹）。19才子（陶傑）嗰幅相好大可能P過圖，故意調咗顏色變咗藍藍地（哋），最大問題係佢專登抽起紅色嗰一半，明顯係不誠實行為。」
中移動亦喺fb專頁發相，證明嗰款「藍色」其實係紫色，講明寓意係祝大家「大紫大紅」、「花開富貴」，仲乘機賣吓廣告：「手機影相冇色差」，「係時候換機啦。」「Kate Hui」就揶揄發帖嘅「Louis Tam」：「紫色加銀色都可以話係藍白，樓主有色差可以去睇下醫生驗眼。」「Darren Lam」攞fb個公司logo嚟玩：「依（𠵱）的先叫......藍底白字......大家過年記得唔好玩！唔吉利丫（吖）！」
「Louis Tam」其後亦補鑊，話「錯就要認打要企定」：「回覆有朋友指出實物係紫色，而且有附圖，影得好過呢張。色差誤事，求證不周，各位大大原諒則個。」■香港文匯報記者 陳川