■林卓廷等放上fb嘅打卡相被網民恥笑。 fb圖片身為北區聯和墟區議員嘅民主黨新界東立法會議員電話廷（林卓廷），竟然要求九巴去改善一條不存在嘅巴士線嘅服務？近日，佢同成班細嘅同九巴見面，話要改善區內多條巴士線班次不足、脫班嘅問題，仲貼張舉牌相上fb以為巧威威，點知有眼利嘅網民發現，佢哋牌上其中一條巴士線「277B」係唔存在嘅。有網民就寸佢：「要幾唔熟書先錯到如此地步？」
點樣解決聯和墟有水貨客阻街嘅問題？拆咗條路個電話亭咪得囉！除咗得到電話廷呢個朵外，仲成為林卓廷不理區務，連被迫做啲嘢都求其是旦、本末倒置嘅經典例子。
近日，電話廷掛住搞「天下為公」攞政治本錢，但為咗出年嘅區議會選舉，就點都要做啲區務啦，於是就同自己幾條𡃁，包括陳旭明、林子琼、郭㙟豐同黃凱盈，就區內巴士班次問題去見九巴代表。
見完九巴代表邀功被恥笑
若要人不知，唔好太低B。電話廷見完九巴代表打卡上fb，即刻俾fb專頁「北區交通關注組」發現，電話廷其中一個要求係「277B等儘（盡）快加強班次」，「網友問：幾時開左（咗）架277B？」
專頁揶揄，今次係民主黨5個人齊齊去見九巴，「五個一齊錯都唔知錯，仲要影埋相，仲要放埋上facebook公佈與九巴會面成果，要幾唔熟書先錯到如此地步？我諗九巴都恥笑中。」帖文仲標註「做社區咁多年都唔知無277B」。
衰咗即潛水 推郭㙟豐認衰
呢篇帖文傳咗去北區、粉嶺等幾個群組。面對恥笑，尊貴嘅電話廷自己梗係唔會蒲頭，而係搵佢條𡃁郭㙟豐代答，話係「手民之誤」喎。不過，好多村民唔係咁諗囉！
「Karolina Yau」就用返電話廷自己區選時嘅選舉口號鬧返佢：「『做好石湖墟？』......我坐左（咗）（九巴）甘（咁）耐都吾（唔）見有條277B。電話佬識吾（唔）識搞交通？」
「Kim Fung就揶揄：「人地（哋）有自己靚車，邊有坐過巴士丫（吖），去托住個牌影相，已經好辛苦啦！」■香港文匯報記者 陳川