■「將關組」早前先要求起地下停車場，一聽到有居民反對，忽然轉軚。所謂「人無恥則無敵」，自己爭取嘅嘢竟然自己走去推翻，仲賴係政府嘅錯。此前，政府接納咗包括「將軍澳民生關注組」幾個區議員等嘅「物盡其用」嘅建議，調整喺將軍澳第六十六區興建中央公園嘅計劃，增建地下停車場以解當區車位不足之苦。不過，當附近屋苑有居民反對有關修訂時，佢哋就忽然轉軚反對，俾網民鬧爆「神又係你，鬼又係你」。
話說喺2017年，政府提出喺將軍澳南一幅連接將軍澳港鐵站至海濱長廊的臨海休憩用地，即第六十六及第六十八區興建中央大道公園。翌年，唔少西貢區議員，包括「將關組」嘅柯耀林、陸平才、謝正楓提出將軍澳泊車位嚴重短缺，要求政府善用地下資源，喺公園用地增設地下停車場。
當時，柯耀林、陸平才同謝正楓喺單張話，第六十六區及第六十八區用咗做臨時停車場，為區內居民提供大量停車空間。「如果上址發展為休憩設施後，有機會吸引區外市民到訪，而原來使用上址停車場的居民，亦要面臨停車位減少的問題，有機會令區內違例泊車的問題惡化。」
為此，佢哋就去信政府，建議有關部門「考慮金鐘花園現時的做法，在休憩公園下興建地下停車場，平衡居民休憩與泊車之間的需要」。
為此，運輸署就喺舊年11月向區議會建議分拆兩區發展，由康文署推展第六十八區的市鎮公園發展計劃，運輸署則負責發展第六十六區市鎮公園，並增設地下兩層停車場。
今年1月8日，區議會就通過康文署率先發展第六十八區中央公園用地嘅建議，而第六十六區要留待周四（24日）區議會嘅交通及運輸委員會上再討論。
不過，包括坐落在第六十六區中央公園用地旁嘅The Parkside等屋苑嘅居民，就反對喺第六十六區用地建地下停車場。
「將關組」嗰班友，就即時打倒昨日的我，喺噚日搞咗個遊行，要政府及區議會撤回在第六十六區加建地下停車場嘅建議。「將關組」嘅主席趙志民更加話政府係「僭建停車場」，「拖延中央公園的落成時間」喎。
居民質疑故意誤導「挑民憤」
「將關組」呢班始作俑者變臉神速，唔少居民都睇唔過眼。「Gary Yau」質疑「將關組」故意發放誤導訊息去「挑起民憤」：「呢幾日嘅討論睇到好多居民係以為有車場就冇公園或者成個公園都延誤，佢應該去解釋清楚而唔係推倒自己本來爭取嘅野（嘢）......明明兩者唔係零和一個有就一個冇，係都要搞二元對立有咩居心？」
「劉曉騰」亦質疑：「牆頭草兩邊擺，枉我投票畀佢，宜（𠵱）家走去幫66區炒車位，半個公園如期起又唔講，誤導公眾。」「Rex Chan」就突破盲腸：「推倒完，下次又可以抗議車位不足，永續抗議，正呀！」 ■香港文匯報記者 陳川