究竟「本土派」可以人前人後兩個樣成點呢？好耐以前當「狗主」黃毓民仲係立法會議員嗰陣，曾經怒罵前財爺薯片叔（曾俊華），仲話佢「講一套做一套」、「善財難捨，冤枉甘心」咁話。但𠵱家冇咗個議席就同薯片叔有講有笑，真係「今天的我打倒昨天的我」嘞。
facebook專頁「剷爆左膠」日前踢爆狗主以前做議員嗰陣，曾經喺facebook出過一個叫《曾俊華，請你還富於全民！》嘅post（見圖），當時狗主大鬧薯片叔「講一套做一套」，因為嗰陣2016年嘅時候，各項津貼由2015年嘅「三糧」減為「雙糧」，同時停止提供公屋免租優惠。
狗主當時仲話：「生活拮据的公屋住戶，以往每年都依靠財政預算案的免租優惠渡過時艱，今年經濟由盛轉衰，公屋住戶更加需要政府的支援，曾俊華卻在此時背棄他們，本辦事處對此表示強烈譴責！」
嘩！咁鬼勞氣，大家一定以為狗主同薯片叔不共戴天啦，點知轉身射個三分波，事隔兩三年薯片叔竟然上埋狗主個「賣台（MyRadio）」度做嘉賓，同狗主一齊論政，變到樂也融融咁。「剷爆左膠」都揶揄，根本就係「戲一場」，仲曲道薯片叔咁「有氣量」，唔止做「民主之父」，做埋「本土之父」都仲得。
成班向來不滿狗主嘅網友梗係都加入恥笑行列啦。「Samuel Lam」就話狗主係「密通匪類」。「Peter Chu」就燒埋其他人嗰疊話：「唉，係咁架（㗎）啦，長毛（梁國雄）夠同曾鈺成勁老友啦......道理一×樣。」
「Gregory Lai」就感嘆：「政治從來都係一場show，尤其議會同所謂時事評論員。」「林方」就恥笑狗主：「今天的碌×打倒昨天的碌×。」 ■香港文匯報記者 馬壯