因為被指人格卑劣而引致幾十個黨友退黨嘅民主黨立法會議員電話廷（林卓廷），近日再因為反口而同「土地正義聯盟」等團體對罵。「土地正義聯盟」班人向來反對新界東北發展就係人都知，電話廷曾經都支持過佢哋，點知後來又終於肯認同返，仲喺新界東北發展嘅相關工程度投票支持推進𠻹。「土盟」頓失盟友，當然鬧爆電話廷啦，而電話廷就透過《蘋果日報》鬧呢班「網民」生安白造、屈得就屈喎，咁咪注定要延續戰火囉。「土盟」同「東北反逼遷動物戰隊」都出咗聲明鬧爆電話廷，強調佢先係「屈得就屈」，仲批評佢「食得就食」，爆佢侵吞前黨友、北區區議員劉其烽喺爭取村民權益上嘅功勞𠻹。
林反批「土盟」「屈得就屈」
唔知係咪終於睇清楚香港社會主流都希望新界東北可以發展，令大家有多啲地方起樓安居，電話廷喺啱啱個星期二嘅發展事務委員會度，贊成將新界東北主體工程、詳細設計同特設現金津貼撥款提交工務小組𠻹，咁樣就激嬲咗由「議會陣線」立法會議員朱凱廸打骰嘅「土盟」同埋其他相關團體啦。
「土盟」當下已經摷返民主黨喺2012年嘅時候話「要求撤回發展規劃」嚟鬧爆電話廷轉軚，仲數埋佢之前嘅轉軚記錄，包括舊年6月先喺北區區議會投票反對新寮屋安置補償政策，去到7月就連同民主黨其他區議員投贊成票。
電話廷其後就透過《蘋果》鬧人哋「屈得就屈」、「生安白造」，仲寸寸貢咁問「幾時有話要不遷不拆先」，而《蘋果》就暗示電話廷被鬧係因為「選舉近了」喎。
同道批吃「人血饅頭」
咁樣咪激嬲「土盟」班人囉。「土盟」前晚就出咗篇千字文，詳述自己理念，再鬧爆「屈得就屈的是林卓廷」，繼續摷返佢哋2012年嘅講法，再爆多少少料，話電話廷侵吞前黨友劉其烽嘅功勞，食得就食，「劉其烽是最常入村了解村民需要的北區區議員之一，不過他也已在去年退黨，矛頭直指林卓廷。然後林卓廷在聲明中，將『改善』了的方案歸功自己，這才是吃人血饅頭。」
唔止「土盟」咁睇，「東北反逼遷動物戰隊」都係咁講，喺fb出文話「最勤力入村探村民的劉其烽也棄你而去」、「自己在房×自己功勞」。「戰隊」仲直接將電話廷反轉豬肚嗰嚿屎摷埋出嚟︰「一邊說安置補償已經好好，另一邊說看不過眼市民等待公屋──擺明你就是說東北居民阻住地球轉吧！」
呢啲針對電話廷嘅言論，「港獨」分子梁金成留言問︰「唔知《蘋果日報》會唔會轉載呢？」「Carol Tai」就反問︰「仲有人信民主黨？！」 ■香港文匯報記者 甘瑜