■《蘋果》護航電話廷，也弄出了八股文來，總之他們自己就信了！ 網上圖片民主黨電話廷（林卓廷）得罪咁多自己友，都仲可以咁大口氣，之唔係有反對派喉舌《蘋果日報》撐腰囉！前日「議會陣線」朱凱廸打骰嘅「土地正義聯盟」開佢拖，鬧佢喺新界發展方面轉軚，《蘋果》搵佢回應嗰陣，佢仲聲大夾惡話人「生安白造」，但報道一句「土盟」回應都冇。中文大學「獨」講師劉正更加留意到，《蘋果》喺篇報道當中，用到「被屈風雲」、「選舉近了」嚟形容今次事件，擺明想話「土盟」另有所圖，寧願得罪「土盟」都要死攬電話廷𠻹。
劉正喺佢自己fb專頁「無神論者的巴別塔」鬧爆《蘋果》：「為咗幫林卓廷護短，你可以去到幾盡？」
佢話報道入面一口咬定「土盟」開電話廷拖單嘢係「被屈風雲」，「你𠵱家肯定林卓廷一定係被屈㗎咩？唔畀『土地正義聯盟』批評有理有據㗎？教精你呢位《蘋果》文盲記者，至少扮吓中立，用『被屈疑雲』會唔會好啲？」
佢仲提到《蘋果》喺報道臨尾安撫電話廷，叫對方唔使咁介懷，皆因選舉近了，呢啲咁嘅事可能會陸續有嚟，質問《蘋果》係咪想話「土盟」就係分裂反對派、拆散大台嘅鬼，但朱凱廸未來隨時都無機會再選，「然後你想話佢個組織嘅成員走嚟抹黑你民主黨鎅你票？傻×咗？……究竟你《蘋果》記者係陰濕定無知？香港第一大報？收皮啦！我估兩樣都係。」
原來戇橋咖喱又缺席
「土盟」鬧電話廷已經唔止一次轉軚出賣東北村民，舊年6月喺北區區議會投票反對新寮屋安置補償政策，去到7月就喺立法會財務委員會投贊成票。
劉正順便踢爆，代表新東嘅公民黨黨魁戇橋（楊岳橋）同「新民主同盟」咖喱范（范國威）當日會都唔開、票都唔投，但早幾個禮拜就去探村民扮關心做晒騷，「究竟佢哋同林卓廷邊個賤啲？我分唔到。」
「Chris Wong」驚嘆《蘋果》可以咁樣攬到個大台實一實：「今次連班『左膠』都賣埋都算好嘢。」「Sidney Paget」就叫懶激進但都係大台一分子嘅社民連醒定啲：「×票終於都×到『左膠』，度好今次村民點諗未呀（社民連副主席）黃浩銘？」「Chris Yuen」就寸戇橋同咖喱范：「『關鍵一席』『偽本土』全部都唔投票。」 ■香港文匯報記者 陳庭佳