■吳定霖將自己同電話廷嘅直幡插到擋住民建聯嘅直幡。 fb圖片正所謂有其頭必有其𡃁，電話廷乜嘢人格大家都知道，跟佢搵食啲社區主任都係差唔多質地㗎。喺沙田打躉嘅民主黨社區主任吳定霖，日前就俾人周到佢將自己同電話廷啲直幡，插到擋住民建聯啲直幡，手腳真係唔多乾淨噃。
民建聯沙田區議員董健莉喺faceboook上載咗幾幅相，顯示吳定霖喺大圍美林邨對出插直幡，但似乎違反咗各門各派落區嘅君子協定，插到同一早棟咗喺度嘅民建聯直幡鬼死咁近，有一兩幅仲擋到應𠻹，大嘆：「唔係呀嘛？」佢仲笑言話自己其實唔係咁喜歡同陌生人面貼面，「雖然係旗幡，但感覺上也不太自在。擋住別人的旗幡感覺會好點嗎？」
董健莉話嗰度雖然係公眾地方，大家都可以用，但都要睇吓大家有無政治道德。「Jet Wong」就覺得呢班人根本冇道德可言：「你同佢哋講道德，你傻咗？」「曹玉華」就叫佢企硬：「亞莉，不可以任人魚肉喔！我雖是個小市民，但也可以撐你。」
有人就覺得吳定霖咁做得啖笑，「Mandy Fung」話：「畀佢囉，抽水王去到邊都要抽人水。」「Steven Chan」仲抵死：「我第一眼睇到係林生（電話廷）棄暗投明，入咗民建聯。」 ■香港文匯報記者 陳庭佳