身為北區區議員嘅電話廷（林卓廷），一直俾人批評唔理當區事務。近日，趁住區議會同警方傾掂數，採取行動打擊水貨客，佢就撲出嚟想搶人功勞，話喺即將來臨嘅周日（27日）搞「反水貨遊行」。有人就狠批佢咁耐以嚟唔做嘢，係到今年區議會選舉時先做show。有「港獨」分子就想「搶上搶」，話明到時會趁機搞場大龍鳳，一旦出事，相信電話廷都難辭其咎咯。
話說電話廷話要搞反水貨客遊行，香港文匯報早前已經踢爆，北區區議會早前已經着手處理有關問題，警方及食環署亦已承諾會在歲晚加派人手維持秩序、疏導人流，而區議會亦會喺下周一同下周二到場了解情況。
電話廷身為北區區議會議員，當然知道呢件事啦，所以先至會「提前」搞遊行，想將區議會嘅集體功勞當做自己嘅功勞。
不過，所謂人無恥又無敵，電話廷近日喺幾個北區嘅fb群組同專頁猛咁宣傳佢呢次遊行，想多啲人撐場。唔少網民留言鬧爆。「Mavis Kong」就踢爆：「你就受薪乜都做唔到，今年（區議會）選舉就叫人一齊去抗議。你作為雙料議員做返好上水嘅方法就係叫人一齊去遊行？」
「Roy Li」突破盲腸：「咪玩啦，今年新年大陸（內地）放早香港一星期，即係大陸（內地）人係（喺）年廿六已經走晒返鄉下，踢×咩！」「Peter Tse」揶揄：「口碑太差，莫講吹雞，吹乜都無力，搵鬼去。」「樂少」更將矛頭直指電話廷：「講真，為上水，北區，甚至香港做啲野（嘢）其實絕對唔係問題，但最大問題係你……。你到底知唔知先！」
抽人水者人亦抽其水。喺上屆區議會選舉低票落敗，「北區關注水貨客關注組」嘅發言人梁金成就發帖，號召佢嘅支持者當日都去埋一份，仲寸電話廷「有政黨用四年時間，去發現北區的一項重大民生問題，有政黨在北區區議會十多年時間，仍然當此問題不存在」，然後就話自己一早就關注呢件事咁話。
網民「Siu Mei Dllm」就附和，仲話當日要「反白鴿黨」：「遊行嗰日都會即將開始×爆你地（哋）老×民主黨內外每一個×樣！」「LungSam Wei」就唔多同意去埋一份：「條街本身都窄，仲要迫群人去有咩用？況且越多人去參加，咪即係間接幫電話亭（廷）造勢？」 ■香港文匯報記者 陳川