為免大家搵唔到重點，紅框就係ViuTV改post後嘅「致歉」啦。 fb截圖ViuTV日前被踢爆搵舞台劇演員扮成新來港街坊做訪問，大班網民鬧爆個節目造假、存心分化、手段無恥，原來ViuTV前晚7點已經靜雞雞喺facebook度改post「致歉」，話係因為當事人出唔到鏡，所以先搵演員嚟「演繹」，仲話對引起觀眾「誤會」及不快致歉喎。其實冇誤會吖，大家咪識穿咗佢唔係新來港人士囉，係ViuTV扮訪問咋嘛。唔少網民都批評ViuTV道歉冇誠意，係俾人踢爆先跪低，根本有心造假，呼籲去通訊事務管理局投訴佢違規。另一方面，有人就出文話ViuTV必須向事件中嘅演員道歉，「還演員清白與公道」，唔通唔止觀眾被騙，連演員都被騙？
事緣ViuTV上星期五喺fb專頁度貼咗《買樓狂想#曲》嘅其中一段片出嚟，3個主持人同舞台劇演員做咗場大龍鳳「家訪」，話特區政府對新來港人士「應該可以再好啲」，唔少網民中伏鬧爆新來港人士，但亦有網民發現個訪問造假，個演員黃劍冰仲曾經出現過喺ViuTV另一個節目𠻹。香港文匯報前日就報道咗件事，並指出ViuTV對網民嘅質問冇回應。
賴新來港者拒上鏡焗住扮
結果，前晚7點、亦即係段片貼咗足足3日之後，ViuTV就去返3日前個post度「編輯文字」致歉，但段片就冇收返，段文一開始依然強調緊「真係問親都係『新移民』」。
ViuTV話，嗰集嘅「部分內容」係根據某個居民提供嘅「背景及故事」去「製作訪問片段」喎，但因為當事人出唔到鏡，所以佢哋取得阿居民嘅同意，就搵演員「演繹」，「ViuTV對於此事引起觀眾的誤會及不快致歉，將積極檢討節目製作的處理手法，致力提升節目質素。」
乜訪問可以係「製作」同「演繹」出嚟？出咗問題仲要係觀眾「誤會」？ViuTV講得出，但網民明顯唔收貨囉，噚日有關「致歉」終於開始流傳，網民亦都再度鬧爆ViuTV。
「Dora Yau」話︰「畀（俾）人踢爆先道歉，有心做（造）假啦！」「冼家樂」認為︰「戶主唔出鏡咪唔好拍囉，都無理由搵人扮呀話！」「Vancent Kam」就質疑︰「（個節目）講到咁多『貪著（着）數的新移民』，竟然搵唔到個肯上鏡？信你個解釋嘅都係無腦，諗呢個解䆁嘅都係。」
「Jack Liu」就睇到件事嘅商機話︰「本人廣東話口音嚴重，十分適合扮演『新移民』，歡迎各大電視台、新聞機構提供part-time（兼職）演出機會。」
被質疑違電視守則籲舉報
有網民認為，咁樣嘅造假風氣不可長，呼籲大家一齊去通訊事務管理局投訴ViuTV。事實上，《電視通用業務守則──節目標準》就喺有關「訪問」嗰部分寫到︰「若原定接受訪問的人士未能或不願意應邀參與真實題材節目，則應在節目中以客觀的態度如實交代有關情況。」咁睇又好似真係違規喎。
今次段片令到舞台劇演員黃劍冰同樣被鬧，疑似係演員朋友、曾經做過網台主持嘅姚冠東就喺facebook出post話︰「ViuTV必須向演員黃劍冰道歉，並向公眾交代節目涉嫌造假事件，還演員清白與公道。」再加埋「演員是無辜的」、「欺負演員可恥」嘅hashtag（標籤）。唔知ViuTV會唔會再改post呢今次？ ■香港文匯報記者 甘瑜