■自由黨聚首切蛋糕，與現場記者共慶人日。 香港文匯報記者何西 攝自由黨噚日特設新春午宴，同傳媒朋友拜年之餘，亦慰勞大家一路以來嘅辛勞。初七又正值人日，所以自由黨專登同大家慶祝「生日」。自由黨主席張宇人仲笑言，以前曾經請其他立法會議員食名牌千層蛋糕，但就淨係買蛋撻畀記者食，俾人話大細超，所以今次就豪氣買咗兩大個蛋糕，認真識做。
榮譽主席田北俊早前整傷咗右手，所以就冇辦法用筷子食嘢。但田大少都仲係咁風趣，笑言要拎番隻叉先食到嘢，「要問個阿姐拎番隻叉先，唔係嘅話我『冇叉用』就食唔到嘢！」
新民黨主席葉劉淑儀同工聯會麥美娟兩個立法會議員，日前聯合提出房屋條例及稅務條例的私人條例草案，引入租金增幅機制，規管領展。
張宇人就話葉劉淑儀曾經游說過佢，但佢對任何干預自由經濟市場嘅法例同措施都有保留，又透露自由黨下星期會召開黨團會議討論對規管領展嘅取態。
15人競區選 港島新人接班
踏入新一年當然要講吓有咩大計，自由黨副主席李鎮強講起11月嘅區議會選舉時就透露，自由黨會派15人參選，其中港島已經有多名新人落區，包括中西區衛城同東區丹拿，而馮仕耕同邵家輝就即將退下火線嘞。 ■香港文匯報記者 何西