曾經因為違法「佔中」前衝擊政府東翼前地而有咗案底嘅「眾志」前主席羅三七（羅冠聰）、現秘書長黃之鋒（河童鋒），噚日都「非常醒目」咁冇參與暴力衝擊，而係特登搵幾個未有刑事案底嘅成員去衝；衝擊時在場嘅「議會陣線」議員毛婆（毛孟靜），嗰一刻冇加入衝擊，而係事後同其他反對派議員發「聯合聲明」去「譴責政府漠視民意」，呢兩件事，充分表現咗反對派一直以來「叫人衝、自己鬆」嘅伎倆。
埋牙就潛水 借炮灰抽水
喺「眾志」一干人等衝擊後，唔少眼尖嘅網民發現兩個「大佬」羅三七、河童鋒以至周庭都冇參與，而係事後先去眾人被拘留嘅警署「聲援」並開記者會。「Ken Lee」就問：「羅冠聰同埋黃之鋒唔係陪住幾個同學示威嗎？」
「Pui Lau」直指：「羅冠聰，黃之鋒，周庭，香港衆志領導人，搞政治，怕坐監，搵學弟學妹下海，計劃好晒，......你仲係大佬大家姐？仲係人嚟既（嘅）？」
「Kan Liu」直指，「老實講坐喺度果（嗰）五個，邊個係冇政黨（『眾志』）背景，係真市民黎（嚟）？」「神駒」仇思達就揶揄：「（『眾志』）長期無活動，零曝光，下次遊行集會年宵搵鬼捐款？」
「Milk Tea」就突破盲腸，指嗰幾個「大佬大姐」係因為怕坐監而喪失參加今年11月區議會選舉嘅資格：「今（昨）日先公佈區選日期。選舉近了，就算中箭（『眾志』）明知入唔到閘都一定會再試下（吓）去參選區議會的。」
被捕者頭痕 毛宣傳遊行
當時喺衝擊現場嘅毛婆，扮晒「關心」咁，但即場就冇加入「靜坐」，事後先喺立法會大樓內見記者，聲稱「眾志」班友係因為「官迫民反」所以先會衝擊。
身為「民主派會議」召集人嘅吽A仲聯同民主黨、公民黨、「專業議政」、其他反對派議員，同佢自己個「議會陣線」發表聯合聲明，話特區政府官員拒絕接收「眾志」的請願信，「視民意如無物」，並譴責政總保安「以不必要的武力對付『眾志』示威者」，仲乘機話修例會「嚴重損害香港的人權和法治」，同時賣廣告叫人出席佢哋喺本月底舉行的相關遊行。
網民「Ng Alex」質問：「巫（毛）婆做乜唔佔埋一份？」「Daniel Lee」亦道：「永遠不見『泛民主將』子女去反嘅？」「Fong Kwun Shing」就寸道：「因為佢地（哋）子女要留返有用之身，去包庇殺人犯∼∼呢d（啲）爛頭傻仔，就由傻仔去做好了∼∼」
■香港文匯報記者 陳川