嚟緊9月立法會選舉，攬炒派聲稱要攞「35+」議席，實行全港攬炒，於是部分「黃絲」及攬炒派政客要求搞初選。當中，攬炒派北區區議員蔣旻正就心郁郁想挑戰傳統「泛民」喺教育界嘅席位，亦即葉建源個位，點知教協會長馮偉華聲稱戴耀廷無聯絡過佢，但轉頭就被揭發原來教協曾主動搵過戴耀廷，仲講到明唔參加初選，一時間令人議論紛紛，唔少「黃絲」鬧葉建源唔敢應戰嘅同時，亦質疑蔣旻正挑戰「泛民」席位，係想搞分化，今次真係「泛民養狗、慘被咬蘿柚」。
事緣日前「立場新聞」出咗一篇報道，指蔣旻正認為教協對「35+」態度含糊，因此有意出選教育界選舉，挑戰獲教協支持嘅葉建源席位。於是，蔣旻正自己聯絡戴耀廷表示願意參與初選，又簽署由戴耀廷安排嘅「攬炒承諾書」，即承諾否決財政預算案。
卸責戴耀廷 被揭講大話
但報道有提及教協會長馮偉華話，同蔣旻正會面時，對方交代唔到點樣舉行初選，又稱戴耀廷一直無聯絡佢哋。跟住，蔣旻正喺facebook上傳咗一張與戴耀廷嘅對話，揭發原來教協曾經主動搵過戴耀廷講到明唔參加初選，又鬧馮偉華嘅說法暗示蔣旻正不負責任，將責任推卸畀戴耀廷，語言偽術包裝成戴耀廷唔聯絡佢哋。
作為教協會員嘅攬炒派元朗區議員張秀賢亦嚟分一杯羹，喺facebook話如果最終教協唔舉辦初選，就會直接支持蔣旻正挑戰教育界個議席。
呢鋪「泛民」養狗慘被咬蘿柚事件，令「黃絲」議論紛紛，頓時內鬥不斷。有部分「黃絲」質疑葉建源點解唔敢參加初選，「Onba Lee」:「老電池咁有能力但又咁驚初選？」﹔「CW Lam」:「葉建源，你既然贏梗嘅話，咪堂堂正正令蔣旻正輸得心服口服囉！」﹔「Sunning Hui」認為葉建源想求穩，「每月10萬，會俾（畀）你做，當然唔會俾（畀）機會你出選了。」
「黃絲」質疑參戰者係鬼
另外一部分「黃絲」就認為蔣旻正係「鬼」，想搞分化。
「Kate Hans」:「『35+』唔係搶建制議席咩？咁點解要攪（搞）葉建源啊？佢衰極建制派都唔認佢，而呢位仁兄點解選咗區議會又走去選教育界？」﹔「余均和」:「而（𠵱）家走出嚟講，搞分化，係都下屆先喇」﹔「張非凡」:「個蔣區議員應該係鬼不懷好意。既然啱啱當選區議員就應該好好服務市民先，冇理由內鬥挑戰贏梗嘅葉建源......你講要攬炒政府......但你偏偏挑戰『泛民』席......無論點講你目的系（係）分化。」■香港文匯報記者 郭家好