攬炒派對立法會議席虎視眈眈，更不時爆出內訌醜聞。噚日攬炒派一撮人大張旗鼓，昭告天下攬炒「大計」，企圖以此吸票，卻不料暴露咗心中只顧念政治利益、盡用語言偽術呃「黃絲」嘅事實。有同路人直言，喺6月9日公布初選協調機制，代表攬炒派大台覺得議席比抗爭更重要，踢爆佢哋唔會叫入選人簽署任何共同聲明，即係入咗議會亦無咗執行當初口頭承諾嘅約束，唔知要「35+」做乜，直頭叫佢哋收皮。
「獨」師譏戴：議席更重要
中大「獨」講師劉正噚日喺facebook專頁「無神論者的巴別塔」發帖話，「戴妖（戴耀廷）就特×登響今（噚）日公布初選協調機制，其實就係代表『飯民大台』覺得議席係比抗爭更重要。」帖文又指「然後最正嘅係，戴妖公然表明，係唔會簽署任何共同聲明，即係『飯民』係唔會就住入咗議會後有任何約束，咁『35+』要黎（嚟）做乜×呀，收皮啦！」
佢又劍指攬炒派的選舉協調機構「民主動力」召集人趙家賢，「話所有唔參加初選嘅人要向公眾解釋點解佢地（哋）為咗私利」，揶揄佢「係咪唔×記得咗教協無參加初選呀？你係咪即係話教協葉建源參選係為咗私利呀？」
電台節目主持「健吾」噚日喺fb發帖，揶揄個記者會係「唔尊重香港人參選權既（嘅）記招」，又引述現場記者提問暗寸佢哋，「有記者夠膽問：點解一個係（喺）教協講初選既（嘅）記者會，教協唔參加初選。」網民「Alan Lau」就話「唔好再用初選呢個字啦，西（篩）選就西（篩）選。」而「Chester Hugo Tom」就更正道「係dq。」「Man Ng」說：「『老泛民』會唔會顧全大局 ，全面退選以團結各方，唔會。年輕人佔民主黨四成都改變唔到民主黨，講咩入議會改變議會？」都話攬炒派各種花樣手段，無非都係瓜分政治利益，純屬各方權鬥博弈嘅平台，從佢哋往績睇，所謂承諾？聽下就算。 ■香港文匯報記者 文根茂