「黃店」又再扼殺「黃絲」嘅言論自由。「渣哥一九九六」上星期學人搞「公投」話要決定新舖位置，點知無啦啦加插咗董事投票佔五成嘅環節，最終逆民意喺最少網民投票嘅地區開舖，結果當然俾網民炮轟內定結果扮民主。不過，「渣哥」竟然刪晒所有負面留言，最終連投票個post都刪埋，令到一眾被滅聲嘅「黃絲」發起罷食行動。呢鋪「渣哥」真係阿茂整餅，冇嗰樣整嗰樣嘞。
前幾日「渣哥」發帖賣小強，講銅鑼灣總店要關門嘅消息，仲搞「公投」叫網民決定新舖開喺荃灣、沙田定銅鑼灣喎，扮晒民主咁同網民互動，結果就瀨晒嘢。「渣哥」其後公布結果，沙田同荃灣各有1.5萬票，而銅鑼灣只有5,000票，但由於「公投」只佔決定嘅50%，故喺班董事嘅「加持」下，新舖將開喺最少網民支持嘅銅鑼灣。
內定造假 刪帖封人 勞煩關公
眼見大熱倒灶，大批「黃絲」網民炮轟「渣哥」為咗宣傳扮搞「公投」，實質只係有內定結果嘅假民主。面對呢場公關災難，「渣哥」一開始以為刪除負面留言就可以滅火，點知反而將「黃絲」嘅怒火愈撥愈盛，燒到成個facebook同「連登」都係，最終唯有刪晒所有關於開新舖嘅post，發篇道歉聲明了事。「渣哥」噚日仲不斷發帖話買咗《蘋果日報》同點樣支持《蘋果》，企圖強調「黃店」身份並轉移視線，但就好似冇咩作用。
「Rob Bie Shing」就喺fb發帖表示不滿：「假民主，小圈子選擇，我只係留左（咗）話佢︰假民主，嘥氣，一句粗口都無講過，就要block（封鎖）埋我？枉一班街坊幫佢拉票，洗板（版）。」「連登」網民「皮寶寶」慨嘆：「驚訝ge（嘅）係經過左（咗）呢一年半一間黃店會眾目睽睽下假民主，加上佢d（啲）支持者係（喺）個新道歉post ge（嘅）留言令我真心覺得驚訝同失望多過嬲。」「廢中王」亦話：「而（??）家淨（剩）返既（嘅）留言只係渣哥篩選完del（刪）完block（封鎖）完淨返的支持post，唔鬧佢的先有資格留低。」
「數碼子」就話：「真心講私人公司想點開咪點開，好哋哋又搞個投票出嚟，之後又揀個完全相反嘅（結果。）錯就唔係話錯，不過肉酸囉。」
事實上，呢間由前港姐譚小環夫婦開嘅「渣哥」，2018年底曾被「黃媒」「毛記葵涌」購入49%已發行股本，去年亦曾多告急呼籲「黃絲」幫襯。「ohmyholy」就問︰「乜做傳媒唔係見慣公關災難咩？點解會搞壇咁嘅嘢？」「踏南天碎凌宵（霄）」就發起罷食：「人渣哥賺錢賺到開分店，黃小店無生意到執笠，大家識揀啦！」
事實上，「渣哥」霸道獨裁都唔係第一次，「張萎縮」就不滿「渣哥」要客人出示身份證先可以入座嘅規定：「去咗渣哥page問，俾人block埋，又係咩玩法？」 ■香港文匯報記者 鄭治祖