「黃色經濟圈」嘅哲學係咪攞盡着數？最近佢哋圍內興起一股撐《蘋果日報》潮，有個教日文嘅「黃師」柳廣福就諗到點樣搵着數，叫學生眾籌一萬蚊畀佢喺《蘋果》落廣告，更聲稱此舉令大家用金錢「支持《蘋果》」嘅同時又可以贊助佢落一個較有宣傳效果嘅廣告。咁縮骨嘅招數都諗到，有人就將佢擺上網公審，一班「黃絲」亦鬧佢「咁核特（突）都做得出」，並質疑「幫佢出錢賣完廣告係咪佢上堂賺嘅學費我有份袋？」
嘲求資助乞食 自己就計到盡
日前有個「黃絲」喺「連登」幫朋友以「教日文嘅柳先生想喺蘋果落廣告，但係想學生出錢」為題開post，暗譏柳廣福為人無品，想食血饅喺《蘋果》落廣告之餘又唔肯自己落本。
同時，樓主亦公開相關WhatsApp截圖，當中有疑似柳廣福本人發嘅訊息，內容表明佢自己唔多認同及鍾意《蘋果》，話睇唔順眼《蘋果》嘅報道手法同老闆言論，但係為咗要向「黃絲」表態，所以想喺《蘋果》度落個廣告。
然而，呢位柳廣福野心好大，佢嫌《蘋果》星期六個「連儂牆」太細唔想買，反而想登個四分之一版面廣告，但要成萬蚊。佢坦言自己唔想出咁多錢，「打算最多給4,000元」，然後問學生有冇興趣參與「支持《蘋果》＋贊助先生登廣告」計劃，要學生眾籌一萬蚊畀佢，「一到10,000，我就會停止收取金錢」。同時，廣告字句同圖畫方面佢完全無諗過落班學生名，只想為佢自己間日文學校宣傳，真係計到盡。
開post嘅樓主都直接鬧佢，「自己想拎光環，但又唔想畀錢付出......明明之前講到好唔鍾意《蘋果》，但係借黃去賣廣告，只係想賺『黃圈』啲錢」，跟手仲踢爆佢口徑不一、自相矛盾，「最好笑係之前Mr.Wally（日本藝人）叫人資助嘅時候，佢×得好大聲話人哋乞食，去埋人哋個page留晒言咁，直情覺得自己係正義嘅『黃絲』。但唔知點解今次又覺得自己叫人資助就冇問題喎。」
做人做到柳廣福咁，又真係抵鬧嘅，一眾網民都瘋狂圍插佢。「旅行安家必備良藥」話︰「錢就學生出大份，名就佢出晒。」「關鍵詞」亦狠批︰「咁核特（突）都做得出，咁×有心直接低調『課金』畀《蘋果》啦！」「玻璃心就咪stalk」質疑︰「幫佢出錢賣完廣告係咪佢上堂賺嘅學費我有份袋？」「naturallife」就計計吓數發現唔對路，「廣告10,000，自己話出4,000，但眾籌又籌到10,000先停，10,000-4,000=10,000？」 ■香港文匯報記者 鄭治祖