■梁振英揶揄攬炒派無原則。 梁振英fb截圖「本土派」、「抗爭派」早已唔妥《蘋果日報》好耐，噚日《蘋果》嘅頭版廣告係一張攬炒派議員喺立法會乖乖坐定開會嘅相片，又寫道：「堅守議會陣線，擋惡法抗強權」，落款竟然係「一群市民」，結果進一步激嬲呢啲激進勢力。「連登仔」噚日就揶揄，廣告唔係「一群市民」刊登，而係「一群泛民」為咗政治利益而登，仲話要罷買一日以「表達民意」。全國政協副主席梁振英亦喺facebook貼咗《蘋果》個頭版出來，直言廣告係反對「總辭」，撐人大決定，「這些人一天到晚談政治理想，今天都露餡了。」
梁振英喺facebook分析話，該廣告費大概同香港大學學生會使嘅18.8萬元差唔多，揶揄︰「有這麼慷慨的『一群市民』花這麼多錢登廣告，就是為了反對總辭，為了撐『泛民』接受人大常委會的決定，『繼續履行職責』 。」佢又問道：「龐大名利當前，『泛民』的原則幾錢一斤？」
人大關於立會延任嘅決定出咗之後，成班攬炒派議員就叫囂話會考慮「總辭」，但「熱血公民」嘅蟲泰（鄭松泰）率先宣布會留任，攬炒派舊電池、公民黨主席涼瓜（梁家傑）等又突然蒲頭話唔應該「總辭」，其餘攬炒派議員大多閃閃縮縮，直到噚日先出集體聲明話傾向留任。網民「Kin Wu」篤爆話：「『犯氓（泛民）』一路集體沉默無非有兩個原因；沒有好的理由不總辭，先由涼瓜和假市民制（製）造假民意，再免（勉）為其難移船就勘（磡）。」
「Danny Chan」就笑道：「佢班蛋散咁無風骨嘅？」「Joan Wong」亦調侃話係攬炒派自己出錢登廣告，「廿九幾人分攤十九幾萬，然後每人每月淨袋十九幾萬，制得過！」
個廣告亦令「連登仔」十分憤怒。「你知道得太多了」喺「連登」發帖開罵，直情將廣告落款嘅「一群市民」劃去，話應係「泛民議員」。「永無夕陽」仲話：「今天唔買表達民意！」「吉列豬扒」亦話本來想去支持下，但「睇到封面即時放返低」，又話擺明係佢報格有問題。唔知《蘋果》同班「泛民」又睇唔睇到呢班市民嘅心聲呢？
■香港文匯報記者 杜思文