■梁振英寸胡志偉「搬龍門再踢過」。 梁振英fb截圖嗰頭鬧完人轉頭又搵對方求救，民主黨（鴿黨）臉皮真係成呎厚。話說鴿黨噚日同「抗爭派」交鋒後，可能心知大勢已去，該黨有人喺香港民意研究所公布民調結果前不停質疑結果嘅準確性。民研總監鍾庭耀噚日就發晦氣話，呢啲民調好多判斷應由委託機構諗，委託機構推晒畀人但又話機制得唔到結果，「咁佢哋自己諗掂佢」、「唔鍾意（個結果）咪抽籤囉」。
揚言要民研重做民調
鴿黨話搞要搵「有公信力」嘅「獨立機構」去做去留民調，仲質疑民研之前做落、噚日公布嗰個民調唔準確，結果噚日公布個調查結果真係唔啱�哋聽。民主黨主席胡志偉傍晚見記者時就死撐，話鍾庭耀都承認調查結果有誤差同限制，所以嚟緊鴿黨會透過辯論畀市民「全面理解」佢哋去留嘅利弊，仲話已接觸香港民研，預計9月開始民調。
全國政協副主席梁振英就喺Facebook轉發胡志偉回應民調嘅視頻，仲有一串hashtag（標籤），包括「輸打贏要」、「搬龍門再踢過」、「大多數人支持延任就是最科學的民調」、「真的沒有考慮一年400萬薪津的因素？」、「胡志偉食相難看！」
網民「陳朝安」就質問鴿黨：「依（𠵱）家人地（哋）冇公信力咩？得你有份搞先有公信力？」「Ray Wong」就話：「你班友仔死雞撐飯蓋，我信港人，你哋要再做民調，我地（哋）未驚過。」
或者鍾庭耀都感到被人擺上枱，故噚日回應傳媒提問時隱約有啲晦氣，話若真係由香港民研負責，佢就建議實行雙門檻，喺剔除所有「無意見」嘅樣本後，只要全部受訪者中有逾半傾向同一方向，或「泛民」支持者中逾三分之二傾向同一方向，就按嗰個方向決定。不過，佢就講咗番耐人尋味嘅說話：「門檻叫你去咪去、留咪留，但檻唔過咁點呀？自己諗掂佢。我意思即係咁，抽籤囉如果大家唔鍾意（個結果）。」
鴿訟兩黨一心諗住搵到逃生門，點知就被鍾庭耀形容係壞事：「呢次民間投票或民調係唔應該做嘅，只要有選舉就好容易辦」、「民意科學得到嘅數據都不能解決所有問題，如果將呢個決定交付一個機構做嘅調查，只可以話係壞事中嘅好事，攞返啲科學根據咁」。■香港文匯報記者 鄭治祖