為咗利益，「黃圈」互片已經係一件常事。近日「黃店」「Let's Jam一起果醬」就被人喺「連登」上開post喪鬧，話佢間店啲嘢好鬼難食，又指店老闆想埋「渣家軍」堆，成日針對「人血龍門」喎。不過，「Let's Jam」都不甘示弱，直接喺fb開post反擊啲「黃絲」，話「連登」上嘅留言都「不知所謂」，全都係失實同抹黑喎。雙方鬧得不亦樂乎，有網民就直言「黃圈真係好恐怖」。
「龍門」促「Let's Jam」炒兩舊伙記結怨
「黃店」「龍門」此前被人踢爆今年1月臨時減員工花紅，兩個員工不滿一齊轉投另一「黃店」「Let's Jam」，點知「龍門」老闆張俊傑就打電話鬧咗「Let's Jam」老闆一個鐘，仲要求佢炒咗兩個前員工??。此後，「Let's Jam」就同另一黃店老闆「渣哥」經常唱「龍門」。
日前，有人突然喺「連登」開post數臭「Let's Jam」，話佢啲嘢大部分係雪藏，「和牛漢堡啲肉係瘀黑色，成日執渣哥口水尾，人地講咩，佢又跟著（住）講，成×日針對龍門，好似想埋渣家軍堆，可惜人地唔show佢。」有人更「畫公仔畫出腸」：「咁得閒××龍門，不如專注下如何改善食物質素啦。」另有人就話佢啲嘢賣得貴咗，又「出書抹黑龍門」同成日喺fb攻擊話佢啲嘢難食嘅網民云云，認為佢係「黃圈癌細胞」喎。
就此，「Let's Jam」老闆梗係忍唔落，於是喺fb出長文反擊「連登」。佢先係稱自己唔識「渣哥」，「但我識龍×老板（闆）張生，自從佢打電話用粗（粗口）×左（咗）我成個鐘，我就發現佢為人有問題，所以我見到睇唔過眼嘅事，我批評佢。」之後又話佢本書入面無提過「人血龍門」，一切都係假嘅。
喺定價同食物質量方面，佢又解釋佢從來都無講過西貢係遊客區，「間間食肆都係咁嘅價錢，我定價從來都係按成本去定價，只能夠講其實成本唔平。」，又稱「雪藏貨就一定㗎，我比塊A5和牛你唔通即刻劏隻牛俾（畀）你咩」。
花生友指「對家」請打手抹黑
圍觀事件嘅網民就認為係身為「對家」嘅「黃店」請打手嚟抹黑對方，以圖發展自己嘅利益。「Joe Cheung」話：「呢期啲『黃店』係咁比（俾）人攪（搞）分化。」「Edward Je Lambert」認定係對家搞「分化」，「明顯係對家玩滲透搞分化，無需（毋須）理會。」「Ellery Doe John」認為「黃圈」好恐怖，「以前有『飯民』盲粉，依（𠵱）家有『深黃』傻粉，都係好恐怖嘅人......」睇嚟，所謂「黃圈」「齊上齊落」、「不分化」等嘅口號喺金錢面對不值一提喎。■香港文匯報記者 郭家好