■「申子居酒屋」俾「連登仔」員工鬧爆拎「黃店」光環攞着數，無良壓榨員工。 連登截圖「黃色經濟圈」真係咁好搵？日前又多一間標榜「黃色」嘅曙U被自己員工爆料，話佢用「黃」攞盡着數同光環，卻不斷欺壓「手足」，不但工作量極大、返工無食飯時間，更有人受咗工傷後被炒，疫情期間被「cut」更，老闆日日「爆粗」，人品極差。當然，喺「連登」發帖亦無法解決問題，有「連登仔」就建議爆料事主搵勞工處維權，仲唔使錢𠻹。睇黎喺「拳頭大晒」嘅「黃色經濟圈」，打工仔要生存都唔係易事。
「黃店」「申子」嘅老闆Ian，自認後生時曾加入黑社會，家庭變故後從事飲食業「改過自新」，因此「申子」唔單只打着「黃店」旗號，仲話會僱用更生人士同有「抗爭經驗」嘅「手足」。
批老闆「偽黃店」招搖撞騙
自稱做過「申子居酒屋」員工嘅「demigod」，就喺「連登」大鬧「申子」係「黑店」、「偽黃店」，拎住「黃店」個名招搖撞騙，仲大爆老闆處事態度、員工福利等情況同媒體報道完全唔同，兩位老闆嘅「偽善程度」相當恐怖。
「demigod」講咗「申子」三宗罪：一嚟人工低，二嚟基本上返下晝四點，收凌晨兩點半都冇得食飯，三嚟奀M登唔同「手足」講清楚工作詳情。疫情禁堂食後，佢表面講為咗「手足」要撐落去，但其實好多人都俾佢「cut晒更」，甚至叫員工提早放工。
佢話老闆份人亦極有問題，淨係要「面同錢」，永遠都係人哋做錯，「有次仲問人咁廢點做人老豆（竇）」。餐廳價錢相當離地，「食物製作嘅過程中佢係會責怪員工落得太多料。」
佢仲話「申子」完全無員工福利，有次有個員工唔小心插穿手送咗去廣華，「佢仲笑×人，後來唔想賠工傷，私底下炒咗個員工。」仲有次唔畀員工請假幫「出咗事」嘅「手足」搵律師。
「連登仔」「為何不浪漫」見帖後就話要「清理門戶」，更調侃話，「還『手足』一個食飯時間，大家唔好再食『申子』。」
「申子」反咬「手足」無禮玩失蹤
「申子」見狀，急急喺facebook帖長文澄清，仲扮慘話「一路打一路喊」。「申子」解釋，「人工低、待遇差」係因為人工唔劃一；招聘時已講咗份工好辛苦，無「壓榨員工」；疫情期間要考慮同事情況，要盡量安排唔放無薪假，並非炒人；嗰個整親嘅同事喺6月30號受傷，佢6月已經辭咗職，冇再出現，所以唔係因為工傷炒佢喎。
佢仲暗示有手足工作態度差：「我都要對得住客人，站在客人角度，侍應扮企鵝、玩手機、企埋一邊傾計（偈）同冇禮貌，你會有咩感受？如果你嘅員工，唔係遲到就早退，成日射波，呢個老闆應該點樣做？」■香港文匯報記者 杜思文