■「北區黃色生活圈」在fb宣布將「鐵板神燒」由「黃店」轉為立場不明。 「北區黃色生活圈」fb截圖自從有「黃色經濟圈」之後，「黃絲」嘅生活質素有冇改善就唔知，但請「手足」、炒「手足」，甚至炒「手足」唔畀代通知金嘅情況，就間唔中都見到。噚日，攬炒派facebook專頁「北區黃色生活圈」就出文點名某餐廳解僱「黃大廚」，宣布要將該餐廳踢出「黃店」名列，但就直言其實自己搵唔到個「黃大廚」了解原因，呢鋪真係「審咗先講」嘞。
明言解僱原因不詳
「北區黃色生活圈」噚日出post，話收到消息，餐廳「鐵板神燒」已解僱「黃大廚」，所以佢哋暫時將鐵板神燒由「黃店」轉為立場不明，「本圈將會進行了解，是否勞資糾紛還是政治立場問題。......據消息指『黃大廚』昨晚即日通知被解僱，原因不詳。正找尋『黃大廚』中。」「北區黃色生活圈」仲話「正努力尋找資方作出了解並對質。不想錯怪任何人，但不容許任何扮黃食人血事情出現」。
唔知解僱原因都可以公審人？對「黃絲」嚟講係可以㗎，因為「北區黃色生活圈」就搵到個「前職員」話個餐廳老細支持國安法、用政府派嘅口罩喎，仲話以前間舖貼文宣係「店內職員自發，老闆沒有支持但亦沒有阻止」，又話「前段時間大部份（分）『黃職員』已離職」。
網民「Joe Kwok」都睇唔過眼質問︰「黃就唔炒得咩？未知事情始沒（末）就公開，再語言中暗示立場成疑，未審先判，真係好事咩？」「Ivan Fung」就話︰「執×咗去啦，又咸（鹹）又貴，完全唔好食。」「呀二」則一針見血地反問︰「所以因為咁而『黃大廚』冇得做？」 ■香港文匯報記者 甘瑜