■「韓寶生」澄清自己叫王茂俊，但就被指係演員。資料圖片喺「831事件」中被造謠捧成「被打死烈士」嘅「韓寶生」，日前自爆自己根本冇死，真名其實叫王茂俊，只係因為面對多條控罪而一直低調行事，現在仲已着埋草去英國呢。唔少「黃絲」睇完佢接受傳媒專訪嘅連番提問後，卒之要無奈咁面對現實，知道原來自己蠢足成年。不過，對部分「黃絲」而言，冇人死就「畫面唔夠清」，於是繼續掩耳盜鈴，仲喺網上傳翻生嘅「烈士」係「演員」喎，唔少「手足」都話：「付出完比（俾）人當鬼真係令人好傷心架（㗎）！」
「Stephanie Chin」日前就喺facebook上載張疑似法庭資訊，上面冇日期、冇地點、只係得一班被捕者嘅姓名、年齡同職業，其中就有「韓寶生」個名。佢喺帖文話：「小心卧底8.31.2020 網上蒲頭，居英的王姓演員話韓寶生其實係佢自己採用的假名，痴（癡）線啦，警方落案八條罪係要用身份證上的真名架（㗎）！」
付出完仲要被當係鬼
唔少網民都鬧佢屈「手足」係鬼好過分。「Tammy Yip」咁講：「之前可唔可以做下（吓）功課？你呢個有韓寶生名嘅名單係11月12號被捕，831被捕又無上庭嗰個叫王茂俊！Del po（刪帖）啦，唔好再捉鬼喇，王茂俊又好，韓寶生又好，付出完比（俾）人當鬼真係令人好傷心架（㗎）！」「Connie Yeung」都話：「可唔可以唔好再捉鬼呀，手足已經被迫流落他鄉！」
有網民發現，原來「Stephanie Chin」上載張疑似法庭資訊，份名單無論人名及次序都同《本土新聞》舊年11月14號報道嘅西九龍裁判法院法庭資訊一模一樣。
「Cheung Kei Karl」話：「呢廿八個人係去年11月12日的中環『和你lunch』，28人被控非法集結、違反《禁蒙面法》等罪的被告，同831無關， 韓寶生係另一個人，唔係831影到果（嗰）個！」 「Kobe Ng」就話：「信自己對眼，關於韓寶生明明寫住11月份中環集結，關咩831時（事）？」
心水清嘅網民就指出，一直都只係有手足掩耳盜鈴，唔了解成件事。「Leonard Yip」話：「你搞清楚先啦大佬，依（𠵱）家佢（王茂俊）係話啲人當咗坅Y韓寶生，佢唔係否認韓寶生呢個人存在，係否認緊佢係韓寶生咋大佬，你不如查下（吓）有無王茂俊先啦，懶醒！」
王茂俊被聽成韓寶生
有網民就翻睇王茂俊「831」當晚喺太子站俾警察制服在地嘅直播片段，原來用黑布蒙住口嘅王茂俊回答記者自己嘅名時，的確係講「王茂俊」，只係大家聽錯咗做「韓寶生」。「Leo Chiu」咁話：「韓寶生係大家聽錯左（咗），我都聽錯左（咗），睇番（返）d（啲）片，係大家聽錯『韓寶生』，......當時咁惡劣環境唔係咁易講得清！」 唉！所謂「831太子站打死人」所來都係冇證冇據，又何苦庸人自擾呢！ ■香港文匯報記者 黃書蘭