讚「三白眼」「好認真、好有心」 網民質疑有利益輸送
只要有利益，就冇永遠嘅敵人。為咗解決攬炒派就傳統「飯民」立法會議員應否延任嘅內部矛盾，民主黨林卓廷（三白眼）上月底就同抗爭派嘅鄒家成展開首場辯論，但最後變咗對罵收場。前晚，「三白眼」再「迎戰」喺新界東「初選」出線嘅「獨派素人」劉頴匡，當觀眾以為兩邊又要互相攻訐嘅時候，竟然呆到跌晒眼鏡，事關劉頴匡喺呢場「辯論」不斷認同「三白眼」講嘅嘢，喺踩緊其他「主留飯民」嘅時候又大讚「三白眼」「好認真、好有心」，令網民一度以為去咗平行時空，仲質疑「三白眼」同劉頴匡夾埋做騷，似為咗拋棄同黨嘅豬隊友、準備「單飛」𠻹！■香港文匯報記者 鄭治祖
「三白眼」上次同鄒家成嘅辯論雖然言之無物，但雙方起碼都嘈到面紅耳赤，點知今次佢同劉頴匡嘅辯論和諧到成個講座咁款，事關劉頴匡似乎忘記咗抗爭派要「主留飯民」一個不留嘅立場，竟然話雙方要建立理性嘅恒常溝通平台，又寸「專業議政」嗰班議員實唔敢出席，因為佢哋唔似「三白眼」肯咁認真對待抗爭派嘅意見喎。
狂踩黃碧雲梁耀忠「唔肯衝」
更令人訝異嘅係劉頴匡仲畀埋位「三白眼」戴光環，當劉頴匡問若政府明年再押後選舉，「主留飯民」應否再延任時，「三白眼」拍晒心口話唔會，因為佢講得出、做得到喎。劉頴匡其後又狂踩黃碧雲、梁耀忠等「唔肯衝」嘅議員，同時大誇「三白眼」同許智峯呢兩個日前分別涉暴動罪及妨礙司法公正而被捕嘅議員，十足想人哋「單飛」。咁「三白眼」有咩反應？微微一笑，無啦！完全冇幫其他黨友駁斥過劉頴匡，睇嚟民主黨真係夠晒「團結」。
「三白眼」其後聲稱，若冇民意基礎，「林卓廷」呢個名係無意思，所以佢會繼續代表民意，喺議會質詢官員同留低文字紀錄，繼續道出去年元朗7．21事件嘅真相，引起國際注意喎。記得上次辯論個主體仲係「民主派」，點解今次好似變咗「三白眼」一人咁嘅？
網民對「辯論」好失望
網民都話對呢場「辯論」好失望。「趙金城」就作咗首打油詩：「辯論原來內定先，弱智兒童口無言，內定楳（媒）人說爭辯，鋪定後路做議員，百萬年薪袋咗先……乜嘢叫做大辯論啊？點解姓劉個×街一句嘢都唔×講，淨係識得點頭贊成六尺四嘅講嘢嘅，如果咁樣叫做大辯論，你講×晒啦不如！」「王明橙」就問：「成個辯論似遊花園，事先夾定？定有利益輸送？」
「Bessie Leung」就話：「搞乜『大便論』，最終都係唔捨得12個月人工，大拿拿百二萬（元）。」「劉庭鈞」就回應：「乜佢會為民咩？不嬲都只見佢為銀喎。」「Waiho Cheung」就好奇：「慢必（陳志全）都話唔留，作為『民主派同路人』，你地（哋）唔係唔陪佢？」「章謝」就幫忙解答：「林卓廷那（哪）有風骨！祗（只）有縮骨！」