■網民製圖揶揄慢必轉口風搞到朱隊友跟唔切。 網上圖片攬炒派去留議會一事上，「抗爭派」議員慢必（陳志全）同朱隊友（朱凱廸）一路都行得好前，搞到唔少「主留飯民」都好頭痛。前日，慢必又放風話自己個議員辦事處今個月30號結束，又話搵咗主席梁君彥講離任，朱隊友即刻話同慢必共同進退。點知到咗夜晚，慢必又話如果所有攬炒派議員都肯跟民調決定去留，佢都會跟喎，似乎又去意未決。有網民就揶揄慢必簡直係「彈弓人」，咁多套講法其實都只係爭取曝光啫。
朱凱廸話同慢必共同進退
陳志全日前向自己議辦所有職員發信，話將喺月底會結束服務。同日，佢仲約埋梁君彥討論唔延任嘅約滿酬金安排，兼對「主留」嘅鴿黨（民主黨）踩多腳，話鴿黨根本有晒傾向，大家唔會傾得埋喎。朱凱廸亦轉發該信，話同慢必共同進退。
陸頌雄揶揄佢哋「自我DQ」
工聯會立法會議員陸頌雄就轉發兩人嘅「宣言」，揶揄佢哋係「自我DQ」，又問佢哋𠵱家「選擇劈炮，下一步會不會是眾籌呢？」佢又笑言：「預計今年議會會比較順利」，「主留派」壓力大。一堆朱隊友支持者則齊心叫佢留低，話佢做議員先有多啲資源幫「同路人」咁話。
其實，呢條數個個都識計嘅。慢必前晚又喺facebook話，如果所有攬炒派議員都肯跟民調決定去留，佢都會考慮跟喎。幾萬套說辭，為唔同情況做足華麗轉身嘅準備。
但佢可以華麗轉身，唔等於朱隊友得，因為鴿黨林卓廷前晚已經去咗朱隊友度踩場。林卓廷話，馬上進行選舉與堅守議會戰線「沒有根本上的矛盾」，繼續話要喺立法會入面擋住啲議案，又話堅守議會係「不願見到手足白白犧牲」，道德高地似乎企得高過朱隊友，但朱隊友就連覆都冇覆佢。
網民意見都分成支持「主留飯民」同堅持「杯葛」議會兩類嘞。支持「主留飯民」嘅「Kei Wong」叫大家睇清楚先嘈︰「先攪（搞）清楚，政府用『繼續延任，不用宣誓』，唔係委任，兩者有分別。」「Sam Kong」亦寸抗爭派冇邏輯︰「其實爭取重開宣（選）舉，同杯葛/留守議會之間嘅邏輯關聯係……」
支持「杯葛」議會嘅「Chi Pan Fung」向林卓廷喊話︰「不要丟人現眼了，拒絕委任，捍衛香港人僅餘的一點尊嚴吧！」「Shirley Wong」亦話︰「真係睇得出你班民主黨極想接受委任，不惜一切手段，從?（沒）有去爭取重啓選舉，一味為留底（低）搵籍（藉）口。」「Chan May」寸「飯民」話︰「嗰班『泛民』唔為大局，只為目前利益。」
有啲網民就繼續食花生，甚至認為慢必話走都可能係策略，事關唔少激進「手足」都話下屆一定投畀拒絕延任嘅慢必同朱隊友。「Heihei Maggie Li」分析話︰「犧牲一年，留歹（低）『手足』選票下屆選舉就真，只做多1年定再做4年好吖。」■香港文匯報記者 杜思文、甘瑜