■范國威搞個唔科學抽樣嘅WhatsApp短訊民調。 范國威fb圖片邊個話攬炒派民調一定要睇香港民意研究所㗎？「新民主同盟」區議員范國威就自己整咗份民調畀大家參考，個民調仲發現有46.5%人支持「民主派」立法會議員延任一年𠻹，多過話要總辭嘅39.5%，終於喺香港民研之外畀到參考數據大家嘞。有網民留言揶揄︰「這很泛民，我很喜歡。」
范國威噚日喺facebook公布佢嘅WhatsApp短訊民調，話佢哋喺上個月26號到31號期間發咗1,939份問卷畀將軍澳軍寶區及運亨區街坊，收到26.9%、共521人回覆。結果顯示，多數人都支持「民主派」議員延任，好嘢。認為應該延任嘅人中，主要係覺得「飯民」議員要「繼續為民發聲提出反對意見」、「繼續監察政府」等，反對嘅就係覺得「議會抗爭無用」、「未來一年議會非法違憲」等喎。
「觀察與分析」稱年輕人「撐留」
雖然范國威戴晒頭盔話自己個民調「並非科學化抽樣統計調查」，叫大家自己判斷參考價值，但佢哋都自己作咗「觀察與分析」出嚟，話「支持總辭與否，跟年齡無直接關係，很多支持總辭的街坊都是上了年紀的，相反，不少年輕街坊都支持留任」喎。
佢仲話，兩個立場的民意基礎相近，建議「中間落墨」，「例如邀請初選勝出者參加『民主派』立法會議員的會議，以內部投票決定『民主派』議員在立法會的表決立場。」咦？又唔等香港民研結果嗱？
網民揶揄「這很泛民，我很喜歡」
網民「Ben Cheng」留言揶揄︰「這很泛民，我很喜歡。」「Edward Ng」亦話︰「係囉，留啦！我唔會建議你們把『片酬』捐出來嘅；因為演這無恥角色也不容易呀。認住邊幾個，下次咪使指議會投你！」
不過，傳統「飯民」都有支持者。「Joyce Poon」就暗寸有人分化︰「尊重各位『民主派』立法會議員嘅任何決定，感謝無放棄香港、香港人。兄弟爬山，各自努力。不割席，不分化，不篤灰。……各位議員請用自己嘅專業，對時局嘅理解去作出決定。」 ■香港文匯報記者 甘瑜