「飯民」個個都話攬炒，你估個個都想攬炒咩？攬炒論已經植根「黃絲」腦海，搞到明明只要延任就可以擁有嘅議席，變到好似難以伸手，鴿黨（民主黨）立法會議員涂謹申噚日就喺《蘋果日報》撰文，幫大家溝淡返攬炒情緒，強調「留守議會 寸土必爭」，仲話延任問題係「親共派和保皇黨在場邊不斷煽風點火或挑撥離間」喎，有「抗爭派」支持者睇完呢番火上加油嘅言論，留言叫涂謹申︰「唔該你收聲啦。」
涂謹申喺篇文聲稱，延任爭議係「親共派和保皇黨在場邊不斷煽風點火或挑撥離間」，大家再分裂就係中咗對方圈套喎。佢跟手宣傳「飯民」喺議會可以「強而有力地揭露政府和保皇黨的醜惡面目」、「拖延和減少惡法、劣政通過」、「繼續質詢政府」，又話議會「仍有險可守」，如果唔係政府就「如入無人之境」可以通過一系列法案、議案。
佢雖然話「作為民意代表，去或留應由香港人授權」，但同時又叫市民參考佢哋嘅理據同判斷，「經深思熟慮」先好做決定。
不過，唔少「抗爭派」同留言圍剿涂謹申。「Tam Tam」話︰「你話民主係要聽市民講、以民為主，咁我係最平凡的市民，唔該你收聲啦。」「Gar Chi」反問講到「飯民」咁有用嘅�哋過去有咩成績︰「你地（哋）又做過什麼？聲討就算阻止左（咗）？講國際線，羅冠聰、黃台仰甚至流亡海外，但比你地（哋）做得更多！」「Tk Lau」亦話︰「好心收皮啦！枉稱民主派嘅民主黨！分化香港人！」
鴿黨支持者就群起反擊班「抗爭派」。「Henry Cheung」留言話呢班人係「五毛」、「藍絲」，「Nick Colour」直情爆粗鬧抗爭派冇腦︰「一班hi上腦既（嘅）以為唔留守以（議）會係代表乜乜乜，其實全部段×估，睇下國際線手足同余懷松點講先啦！」
「Michael Leung」就質疑「抗爭派」喺議會外有咩用︰「抽象些講：一、民氣如民意般飄忽不定。二、民眾感覺並不等同政治實力。……之後『抗爭派』具體可做什麽？ 不考慮這點便豪氣凜然地自滅香火，要三思啊！」
網民：唔使講咁多冠冕堂皇理由
「Joseph Chan」雖然撐鴿黨，但就勸鴿黨講人話，承認延任可以用議員身份做嘢，又可以有糧出唔使益對家，唔使講咁多冠冕堂皇嘅理由，「其實講真說話唔會太怪你地（哋）既（嘅）！……其他原因根本就費（廢）話了，因為而（𠵱）家政府根本已唔聽民意，係（喺）議會點反抗都無作用！所以講再多只會令人更反感架（㗎）。」 ■香港文匯報記者 甘瑜