■網民批評「HK Protect香港保護」舊債未清又想借執笠搞特價清貨掠水。fb截圖財過「黃店」手，一去無回頭。一年前開始喺網上賣頭盔、「豬嘴」等「抗爭」裝備嘅網店「HK Protect香港保護」，開業個多月就話啲貨俾海關充公而一鋪清袋，仲聲稱全隊人因為俾內地公安盯上而迫住搬屋，令唔少訂咗貨嘅「黃絲」都唔好意思追數。潛咗水一年嘅 「HK Protect 香港保護」近日終於蒲頭，當「黃絲」望穿秋水以為佢終於回水，點知對方一嚟就話執笠，仲叫大家幫幫手清埋佢啲倉底貨，冇錢買仲有折畀??！咦，點解提都冇提過回水嘅？咁「手足」啲錢點算呀？
「HK Protect香港保護」自從去年8月話啲貨品俾海關充公後，其facebook專頁幾乎隔幾個月先出一次post，啲post唔係新貨有折，就係話努力搞緊退款，真係舊債未還又借新債，弊在一班「黃絲」依然信到足繼續幫襯。
「HK Protect香港保護」日前就打咗篇千字文回顧種種經營困難，最後就話呢場「運動」已轉咗風向，所以佢哋希望呢個「旅程」告一段落，仲話佢哋仲有30萬元「蟹貨」未賣出，??家特價發售，只求回本喎。望真啲，原來個優惠就係買滿800蚊減50蚊，即係九折都冇，真係好實惠呀！
fb專頁「學民苦主大聯盟」噚日就話接獲讀者回報，大鬧呢間「黃店」去年用海關充公貨物為由呃錢唔退錢，事關到執笠都冇提過回水：「賺夠了，bye bye『黃絲』。所以話『黃色經濟圈』真係搵快錢嘅好地方」、「唔知負責人有咩想講下（吓）呢？定係諗住用不分化不割蓆（席）做擋箭牌，拒絕回應呢？」
「Henry Wang」即刻呻：「我想講，曾經因為屋企有小朋友，怕附近放TG（催淚彈）所以同佢買過幾件『豬嘴』，佢一句話俾海關扣晒，就冇咗回事。我一個人冇左一千幾百（元）事少，不過係唔知到底有幾多人冇咗呢一千幾百（元）」。
網民：要消滅奸商 否則港無救
「Eric Mo」就叫「Henry Wang」爆多啲料：「無貨咪退錢，海關扣貨唔應由顧客食，要消滅呢d（啲）奸商，否則香港無得救」。「Henry Wang」就回應話：「我份人好『左膠』，send（寄）返個email（電郵）解釋一下（吓），周轉唔到或者點乜都好，問題係間嘢係連咁樣都冇。」
「Chun SeTo」就狠批：「不求賺錢，只求收回成本？已被捕被殺嘅『抗爭者』都不求『光復』成功，只求收回成本咋。錢就自己袋，風險就人地（哋）受。」「Strange Lee」就揶揄：「人地（哋）買個理念吖嘛」。「Hidi Or」亦話：「係囉『黃絲』大把錢，咪當做慈（善）事俾人呃多次囉！」
■香港文匯報記者 鄭治祖