■經常狙擊「龍門冰室」的「Anita Wong」連發多個帖文，批評張俊傑控告楊朗等於視「手足」為地底泥。 fb截圖所謂「利窮則散」，講緊嘅就係早前高調退出「黃圈」嘅「人血龍門（龍門冰室）」同佢嘅前員工囉。事緣今年4月有位「人血龍門」嘅前員工喺網上踢爆前老闆張俊傑壓榨「手足」嘅黑歷史，其後仲喺「抗爭」文本《消失的聖誕卡》入面公開「人血龍門」嘅「真相」，搞到「人血龍門」一度失去「黃店」嘅龍頭地位。本來以為隔咗近半年件事已經平息，點知張俊傑日前就入稟控告呢位前員工誹謗，仲要求對方向佢賠償因誹謗所產生嘅損失，結果大批「黃絲」網民即刻內訌，有人鬧張俊傑冷血無情，亦有人譏諷前員工自己攞嚟衰。數吓數吓，佢哋啲衰嘢真係多到可以寫本「龍門恩仇錄」。
呢位叫楊朗嘅前員工曾經自爆，話佢本來係張俊傑用3萬元月薪請返嚟嘅手工藝室主管，負責幫「人血龍門」聯絡同寄賣「手足」嘅手藝商品，點知佢喺2月被張俊傑無理解僱，於是決定公開「真相」，阻止對方吸乾「手足」同「黃絲」嘅錢。
佢仲篤灰話「黃媒」《蘋果日報》同《立場新聞》基於唔想拆散呢場「運動」同分化「黃圈」，所以「選擇沉默」，自己「走投無路」下唯有搵「黃營」覺得係「藍媒」嘅《東周刊》幫手。雖然事後成功擊沉「人血龍門」，但佢亦被部分「黃絲」批評係反骨仔。
楊朗再喺facebook發聲明，大呻自己啱啱先因為去年7．21元朗事件被控暴動罪，突然再被張俊傑控告誹謗真係身心俱疲，但就企硬話自己唔會道歉，仲向對方挑機，話睇吓公堂上啲證人點作證喎。
有網民鬧張當「手足」地底泥
經常狙擊「人血龍門」嘅網民「Anita Wong」噚日亦喺fb專頁「倫敦人西先生手記」連發多個帖文，大鬧張俊傑擺明當「手足」係地底泥，佢又摷返張俊傑早前公開承認攞咗「手足」基金嚟填補生意虧蝕嘅言論，所以楊朗絕非誹謗。
張俊傑早前講過，由於「倫敦人西先生手記」同其他「黃店」都有份撰寫《消失的聖誕卡》，所以遲早告晒佢哋。「Anita Wong」就叫對方放馬過嚟：「呢單要幾時先入稟控告㗎！等×咗成個月都冇消息嘅？唔好齋俾（畀）律師信咁核突呀，要好似你入稟告『手足』咁，入稟告我話你賣假口罩呀！」
咁唔知網民又點睇呢？「Chai Chai」就話要支持「手足」：「乜嘢叫『抗暴之戰』！呢個人渣，告返『手足』轉頭，被告暴動基金D（啲）錢去哂（晒）邊？我都未告你呀×街！」「Tani Racy Chen」亦鬧爆：「明知『手足』無錢打官司你都告，有無真正幫過人你自己心知肚明。」
支持「人血龍門」嘅「Yan Wong」就摷返楊朗當日嘅fb post幫張俊傑護航：「條友自己又叫人告，唔告又話人身有屎，告你又話人告『手足』，你有證據你講啲野（嘢）係真嘅就唔驚人告啦，琴（噚）日開始已見『藍屍（絲）』人×谷（Group）不停開post抹黑，大家就知成件事係咩料啦！」
「黃營」歌手霍朗齊話割席
「黃營」歌手霍朗齊就話要割席：「聾（龍）門冰室醬（張）先生控告嗰位小朋友本身係721事件暴動被告，真心如果你仲撐佢或食聾（龍）門，唔該刪除我，因為見到你哋會覺得好嘔心。」另一「黃店」「一起果醬」亦話：「唔好再同我講不分化啦......你哋成日口口聲聲嘅不分化，已經變成咗另一種港式犬儒主義。」「黃式保險YellowInsurance」就認同：「無錯，呢句『不分化』講得多連腦都可以懶得去用。」 ■香港文匯報記者 鄭治祖