■ 「吳浪人」力數龍門難食。fb截圖龍門冰室啲嘢難食，就連「黃絲」都認證。近日，有飲食KOL喺fb發帖，大鬧龍門啲出品係垃圾，特別係被「黃絲」稱為「才女」嘅梁芷珊同龍門合作嘅「即食湯」更加不知所謂，「雖然我應該支持『黃色經濟圈』，唔好食都要食。但你做飲食做成咁，係消費緊手足嘅支持。」
自稱「深黃人」、飲食KOL嘅「吳浪人」近日發帖，話自己去咗幫襯龍門，「去之前，我已經警告過自己，唔好對自己『手足』太高要求，太多事實啦。但一食完，我唔出po唔得。奶茶完全無茶味，似淡奶溝左（咗）水。牛肉，醃得食粉過左（咗）龍。魚柳，無醃底味。磨菇汁，直情無味。個餐湯，自己煲都無心機，仲要唔好飲。」
佢話：「呢餐佢收我70，但要我評分呢（連）20蚊都唔值。雖然我應該支持『黃色經濟圈』，唔好食都要食。但你做飲食做成咁，係消費緊『手足』嘅支持。」
根據「吳浪人」隨帖上載嘅照片，佢口中嘅「餐湯」係一包即食湯咁嘅嘢，而且仲冇倒落湯碟度，而係「連湯碟上」。「林水波」留言時話：「個湯就已經不知所謂啦！」「吳浪人」回應稱：「×佢個老母自己煲都冇心機！」
梁芷珊爛橋 要客開湯包
「Anfernee Yu」亦狠批：「跟（根）本就係包（罐）頭貨加熱...... 問題係你無理由上台（枱）叫個客自己開包湯倒出黎（嚟）先飲囉......」「Alex Wong」寸道：「個湯如果我係個侍應，真係唔好意思放落張枱度。」
睇真啲，個湯咪係梁芷珊搞嘅品牌O'chef lab嘅出品？為咗人血饅頭齊齊食，梁芷珊就同龍門合作，喺龍門賣佢嗰啲「米芝蓮出品」。「Sam Sam Law」說明：「佢唔係自己煲咖（㗎）......梁芷珊話同人合作。唔知乜嘢研究所咁嘅。跟住咁樣上枱呢就係因為想將最鮮嘅狀態比（畀）個客自己倒出嚟自己睇係好嘢。佢話個客可以要求番（反）侍應幫手倒出嚟上。痴（黐）線。呢啲解釋我唔會接受囉∼」
有人就擔心「吳浪人」會俾龍粉圍攻。「Sam Sam Law」話：「啲人（龍粉）好恐怖∼所以我都先提醒你。我唔知係打手定真粉啦......佢地（哋）會話茶餐廳係咁咖（㗎）啦...唔好食你又去...咁咖（㗎）∼」「Na Ta Wwe」則曲道：「嗱，唔準（准）你（吳浪人）咁講架（㗎），撐黃撐『手足』，食屎都要話好食架（㗎）知無？」
「細路女整都好食過佢」
「吳浪人」回應道：「我個女先7歲，我俾佢玩下（吓）煮野（嘢）啦，但細路女玩下（吓）出嚟嘅作品，都好食過龍門！......即係呢，『黃店』雖然有好大班忠實客戶，我地（哋）自覺係『手足』都應該支持。但你明知係『手足』幫襯緊，做嘅出品都唔合格。咁你無良心囉！」
「Phoenixsim Akatsuki」則燒埋另一黃店：「泰式水門都係......對唔住都要講係垃圾既（嘅）程度，唔服去西九試下......我食果（嗰）兜（雞飯），飯濕到出水，雞多骨又細，湯係味精，35蚊細碗果（嗰）隻。」