■ 網民「Josh Lau」買「膳心」月餅中晒伏，開帖吐苦水，即被「同道」質疑係「搞分化」。fb截圖黃色食肆同一般食肆有咩分別？就係畀屎你食都唔可以投訴，一投訴就會俾「黃絲」鬧搞分化囉！有網民近日喺fb專頁出post，話一間「黃店」嘅月餅難食，結果俾人話「又批鬥黃店」。有網民就慨嘆，做「黃絲」真係慘，比「藍絲」更冇言論自由。
「膳心」舔盡血饅 「泥膠月餅」掠水
「黃店」為咗爭食，紛紛推出所謂黃色月餅嚟昆「黃絲」錢，之前俾人踢爆炒「手足」兼拖欠代通知金嘅膳心小館亦唔例外。雖然佢哋公開話會執笠，但係人都想舔盡人血啦，所以佢哋之前力sell嘅黃色月餅都仲係要交貨，唔通回水咁戇居咩？網民「Josh Lau」就喺一個講飲講食嘅fb專頁度發帖，爆晒粗話一個街坊送咗一個月餅俾（畀）佢食，係好具爭議嘅膳×（心）月餅......我希望送俾（畀）我嗰個街坊睇到之後唔好嬲我，我好嬲係因為我覺得你可能俾人搵咗笨，如果你係真係諗住佢係好食，我戥你肉赤。」
佢力數個月餅「舊（嚿）蓮蓉把×地完全冇味，我到底食緊乜×？咬泥膠咁......個蛋黃冇油冇鹹香冇蛋味，一切落去粉碎......個蛋黃係月餅嘅靈魂呀，到底知唔知呀！總結：金玉其外 敗絮其中！一字記之曰：×！」
佢呢個帖引來唔少共鳴，紛紛分享自己買「黃店」月餅嘅慘痛經驗。「Ivaline Poon」話：「試過買民間組織嘅低糖低油蛋黃蓮蓉月餅......感覺上同您形容嘅好似。嗰年仲買咗好多，周街搵清潔專員同紙皮摺疊師分享，希望佢哋冇詛咒我！」「Peggy Chan」說：「我買左（咗）成千蚊，唉......黃蓮蓉最出事，成個餅一砌就散，餅皮碎哂（晒）、蓮蓉散開、蛋黃跌出來......最神奇係蛋黃有渣要吐渣！」「Simone Lam」就唔知係咪想靠害「手足」，話：「買咗未拎，不過揀咗捐畀『手足』，冇所謂啦。」
不過，有其他「黃絲」就唔係好滿意有人公開講真話。「April Wong」質疑「Josh Lau」：「我係你嘅話，會pm佢哋反映，希望可以改善。」「Kenw Ong」亦話：「『黃店』都有高低，吾（唔）得咪幫襯一次就算囉！覺得有改進空間咪pm佢地（哋）囉！」「Jay Sinn」就更直接：「又批鬥『黃店』！」
「Josh Lau」留言質問：「批鬥同批評識唔識分？」「Chan Billy」亦睇唔過眼：「話佢就叫批鬥？你做錯野（嘢），你老闆×你，係唔係批鬥你？」「Maurice Pang」就話：「做佢地（哋）既（嘅）客真係慘，明明係自己錢買唔好食都唔可以大大聲講出黎（嚟），要靜靜雞私底下講！」
經常狙擊龍門嘅「Anita Wong」就留言：「做『黃絲』真係慘，比「藍絲」更冇言論自由。」佢仲標註咗「不准公開批評黨」、「所有問題內部解決」、「維持團結和諧安定社群」、「黃安法」等字句。