■ 「成波之路」得悉被擺上枱後，即時與「LC Fruit」畫清界線。fb截圖為咗投「黃絲」所好，唔少「黃店」都聲稱自己出售嘅產品唔係由內地生產。不過，有一間網上生果店就俾人踢爆以內地產生果充日本貨噃。最好笑嘅係，《蘋果日報》為咗護短，竟將焦點轉移話有內地嘅生果係「假冒日本貨」，講到個「黃店」店主好無辜咁。有網民就留言直指：「一句講哂（晒），你擺明呃人！咁大間舖呃人預左（咗）承擔責任！」
網購生果平台「LC Fruit」標榜自己出售包括「日本糖瓏蜜瓜」嘅中秋禮盒，仲搵飲食界KOL「成波之路」幫手宣傳賣廣告，點知個post一出，即刻俾網民踢爆糖瓏蜜瓜根本係內地種出嚟，質疑「LC Fruit」呃人。
黃KOL誤幫宣傳即割席
「成波之路」即刻畫清界線，話自己出post之前，有同「店主（聯絡人）」確認過set A當中某幾樣生果嘅產地，「佢答我係『日本產』同『台灣產』，而唔係日本品種/台灣品種但『中國產』嘅，當中包括『日本糖瓏蜜瓜』......我真係唔係咁熟生果，所以都要問返『店主』先可以答到大家。」
「Joan Ko」說：「如果（嗰）個產地係真既（嘅）就真係好抵買，所以我勁快手就訂左（咗），宜（𠵱）家睇返佢facebook d（啲）生果價錢，個set既（嘅）定價真係有d（啲）不可思議，要密切留意佢既（嘅）回覆先得。」「Miko Takumi」直言：「比（畀）你試嘅就用靜罔（岡），其他人訂就係糖瓏，呢間誠信有問題。」
眼見群情洶湧，「LC Fruit」就連發兩帖「澄清」，首先將責任推落同「成波之路」聯絡嗰個手下，其後始承認該店在網站上及所有宣傳刊物列出的「日本糖瓏蜜瓜」是不準確的訊息，「本店在此承認錯誤，並深感抱歉......把『中國產』的蜜瓜寫成日本種，是無心之失，並不是故意誤導各位......本店會重新審視各款水果的產地和品質，以及再次檢查所有本店資訊的準確性。」
《蘋果》護短卸責內地批發
《蘋果》喺報道呢單新聞時，引用「LC Fruit」負責人Dennis接受該報訪問時聲言自己因經驗不足，看糖瓏瓜的包裝就「誤以為是日本貨」，並對「沒有清楚考究產地而深感抱歉」，之後就將焦點轉移去所謂「中國貨冒充日本貨」嘅話題上去，話有其他生果商都「中過招」，試圖淡化事件。
但網民就唔收貨嘞，「Julie Ng」說：「『大陸瓜』批發價大概10幾蚊至30幾蚊一個，日本瓜最平批發價百幾元一個以上，冇乜可能唔識分。」「Alice Chan」直言：「一句講哂（晒），你擺明呃人！咁大間舖呃人預左（咗）承擔責任。俾人踢爆左（咗）咪賴自己經驗尚淺，錢就一早袋穩哂（晒）入貨價錢差四五倍，都可以唔知嘅，你叫消費者點會再信你啲貨？」
「Fionon On」就話：「呢間嘢好唔老實，相入面個瓜都唔係糖瓏，糖瓏街巿賣五六十蚊，張貼紙易認所以店主俾你唔俾糖瓏？仲要答你糖瓏係日本產，佢做左（咗）三年無理由唔知幾十蚊個點會係日本？間嘢用錯誤g（資）料誤導消費者作出購買，已經違反商品說明條例，可以舉報佢。」