■林景楠發帖話：「如果要將杯葛《花木蘭》電影的人，都列作反華，那請把我列作反《立場新聞》便好了。」林景楠fb截圖香港本來係一個多元包容嘅國際大都會，並都有言論自由。不過，近日喺香港上映緊嘅電影《花木蘭》，就因為女主角劉亦菲曾經喺微博發帖支持香港警察，俾攬炒派發起所謂「杯葛」，「黃媒」《立場新聞》日前亦因為刊登咗一篇《花木蘭》「中規中矩」嘅影評，俾唔少「手足」狠斥做「垃場」，聲言要杯葛埋《立場》，不過，亦有網民覺得班「黃絲」連影評都要作政治審查，根本就係破壞新聞自由。
唔少「黃絲」見《立場》登咗電影《花木蘭》篇影評都話好嬲。「黃店」阿布泰國生活百貨老闆林景楠噚日就喺facebook發帖話：「立場新聞ByeBye（再見）......如果要將杯葛《花木蘭》電影的人，都列作反華，那請把我列作反《立場新聞》便好了。」佢仲話：「如果是新聞就有責任將事實的真相記錄並發佈......但在一個唔合適的平台上被發佈，與我本身對《立場新聞》的看法有違背......『點解《立場》要割我？』」
「影評唔啱心水都唔使去批鬥」
有網民就覺得，縱然「黃媒」登咗個唔啱心水嘅影評文章，都唔使咁去批鬥。好似「Cano Tsang」話：「我不希望變成批鬥式地去攻擊一個媒體。站在媒體立場，一個專欄作家發表了自己的言論，沒有理由去審查佢嘅立場，雖不同意，也得尊重。所以沒有理由因此去杯葛一個媒體吧。」
有網民亦認為「黃絲」扼殺新聞自由。「Depp Loo」話：「言論自由，本來就包容不同看法和意見，這樣媒體才值得支持......會杯葛的人，自然會杯葛......《立場新聞》的立場，沒有錯。」「Amy Fan」就反問：「如果美心係（喺）《蘋果》賣廣告，《蘋果》係咪唔應該接？」「Terence Gogo」都話：「文革咩，咁都接受唔到！」
不過，有硬頸嘅「手足」就唔係咁諗。「Dorothy Tse」就反駁：「你試吓寫支持納粹黨嘅文章，睇吓有冇外國傳媒刊登？」
「黃絲」斥《立場》係「垃場」
唔少「黃絲」就嬲到話要杯葛埋《立場》。「Nover CL」咁講：「《立場》唔係第一次，好多人已unfollowed （取消關注）！」
「Lee Jack」就狠斥：「《立場》真係『垃場』，仲有班on（戇）×撐『垃場』，立場係中立持平就唔好呃課金啦，報新聞既（嘅）時候就話中立，出大頭既（嘅）時候就新聞自由，眾籌既（嘅）時候就『黃』，垃×圾！」
其實「黃納粹」都有名大家嗌，佢哋最有言論自由嘅時候咪就係批鬥人嘅時候囉。 ■香港文匯報記者 黃書蘭