全力配合「禁足令」
Sanju：我早前都完成14天隔離檢疫，兩度檢測都係陰性。我認為免費強制檢測能夠搵出患者，協助控制疫情，實施「禁足令」會全力配合，因為呢度大部分人都需要外出工作，有可能將病毒散播，或自己感染到。
已經買好幾日餸菜
何先生：我工作同住都喺呢區，當然擔心疫情持續惡化。知道要「禁足」，已經叫老婆買好幾日分量嘅餸菜，按政府規定留喺屋企，唔會離開，住酒店又貴，如果自己染疫會危害其他社區。我一直都有做好家居消毒措施，而且住嘅大廈衞生一般，所以每日都會喺門口噴灑稀釋漂白水，廁所亦每日清潔。
應提早通知「禁足」
陳女士（商販）：政府未有提早通知「禁足」，𠵱家唔知道點樣散貨，水果又唔能夠長期擺喺度，𠵱家整批貨「等爛」。
賣剩水果送畀街坊
鄧先生（商販）：疫情爆發之後生意稍微下跌，市民都選擇到旺角嘅街市買菜，睇到疫情急轉直下當然擔心，呢幾天「禁足」都唔會開店，希望今日將剩低嘅水果「夾平夾賤」賣出去就算，甚至送出去畀街坊，避免浪費。
圖/文：香港文匯報記者