●有「黃營」fb專頁踢爆有「黃店」賣嘅產品係抄襲「同路人」嘅設計。 fb截圖有啲「黃店」成日以「本土」原創做生意招徠，但原來佢哋嘅產品設計都抄襲返嚟？話說多間「黃店」趁住除夕臨近，諗住聚埋搞個年宵市集賺返筆錢，但Facebook專頁「黃色文創圈」近日就踢爆，原來唔少市集裏面嘅「黃店」都係賣緊其他「同路人」創作嘅文宣作品，仲要事前冇問過創作者同意，又大鬧呢啲行為等同偷嘢。其實做得「手足」都係「自己人」啦，有啲嘢又唔使咁計較嘅。
「黃色文創圈」喺帖文話，呢幾日嘅年宵市集出現好多唔愉快嘅事件，原來好多「黃色文創人」嘅原創文宣作品，喺冇經當事人同意嘅情況下，突然成為咗某啲「黃店」嘅產品。帖文又扮晒正義咁話：「即使『義賣』『籌旗』『幫手足』『本土製造』『made in HK』都完全唔足以成為任何盜竊的理由。無錯，係盜竊，姐（即）係偷嘢」，又hashtag「同賣老翻（盜版）有咩分別？」
根據帖文嘅相片，原來唔少原創者嘅設計，都被年宵入面嘅「黃店」攞嚟印咗喺利是封或飾物上面，呢班創作者都各自開post大鬧，話佢哋免費釋出嘅文宣，係畀大家攞嚟「行公義」而非做產品喎。
網民揶揄「義賣」名義掩劣行
網民「Kasper Tang」就貼出一盒安全套嘅相片，揶揄「勇武手足」都只係用嚟賺錢、用完即棄嘅condom，「So Fong」就話：「所以從來都唔會買所謂『黃色市集』嘅嘢， 要買就直接去創作者本人page買。」「Ann Wu」就認為賣黑暴卡通產品嘅「同路人」都冇尊重版權：「其實大家買『Pepe』『連豬』『連狗』都係冇專（尊）重知識產權，不過都係一句『手足』一句『義賣』掩蓋左（咗）成件事囉。」
「Windy Li」就話：「我係覺得呢啲人最好笑既（嘅）係，話拎人地（哋）心血搵錢係幫緊『手足』......既然講到印人地（哋）文宣係為咗捐錢，咁印刷費直接捐出去咪係，搞咁大場龍鳳咪又係為咗錢......（最後）有冇捐到都冇人知。」 ●香港文匯報記者 雨航