●有「連登仔」質疑參與「支聯會」遊行是「送頭」行為。 「連登」截圖「支聯會」日前提出今個月30日喺維園舉行所謂遊行，據悉警方將分開兩次與「支聯會」進行會議，即20日先商討有關「5．30」遊行的安排，另於25日商討相關晚會安排，即目前未知警方會唔會批准「支聯會」舉行遊行和集會。不過，近日已經有「連登仔」喺連登討論區發文公開表明反對「5．30」遊行，認為係一場送頭活動，並逐一反駁鼓吹其他人出嚟遊行嘅理由，例如係表態式嘅嘢就無謂做喇。
一位名叫「耆縫敵首」嘅連登仔以「搵到隻放負五毛狗詆譭530嘅遊行」為題發文，指佢自己就係嗰個反對遊行嘅人，因為佢覺得「表態表咗差唔多兩年，冇突破嘅話用同樣方式表落去有咩意義？」
批表態式行動心態有問題
佢並逐一反駁鼓吹其他人出嚟遊行嘅理由。對於有人稱：「咁唔通咩都唔做？」佢質疑：「冇嘢好做就要用一路以嚟都冇用嘅方法做住先嚟安慰自己『盡做啦』？」佢又斥黃絲「要有行動先等於唔靜，要有人表態先覺得有人做緊嘢」嘅心態有問題：「斷估『12港人』走佬嗰陣又唔會喺連登開post掛（啩）？大家要求『手足』靜靜雞但就要『手足』做啲見得光嘅事俾（畀）你哋睇？原來做嘢目的係幫你哋打氣？」真係講到黃絲面懵懵。
對於有人覺得有「手足」參加呢啲遊行集會係「手足」嘅個人意願，「你咁樣即係唔尊重佢哋」，帖主就反斥咁樣係「亂送頭」：「咁所以我問大家，到底呢個遊行除咗表態有咩用？而只係表態又改變到啲咩......差唔差在冒一個風險去表一個唔知改變到咩嘅態？」
喺可行性方面，帖主指由上年5月開始已經無可能聚到人，稱：「咁到底齋行有咩用？」
黃絲和應斥政棍眾籌呃錢
總之呢位「連登仔」好反對黃絲參與遊行，同時亦有其他連登仔認同遊行冇用，叫人唔好去。「藍絲曱甴水門×雞」話佢表弟坐完監出嚟喺麵包舖做緊打雜，但出名嘅黃絲政棍未入監都已經開始眾籌，加上黃圈種種呃錢劣行：「香港人就係鍾意扮×晒野（嘢），坐12年監嗰個仲有冇人記得佢叫咩名？唔好在（再）永續運動啦，咁多人坐監仲唔醒覺？覺得自己憑乜嘢可以有得鬥？」
希望呢班所謂「手足」真係可以早日回頭是岸啦。●香港文匯報記者 鄭治祖