4攬炒區員退盟 網民：最憎人道德綁架
攬炒派又內訌。日前，有網民同區議員喺facebook講到大埔四里一帶店舖造成嘅阻塞問題，講講吓就有人用「大埔民主聯盟」fb專頁嘅身份，留言批評已辭任區議員一職嘅胡耀昌係「逃兵」，更指胡「遺下蘇州屎比（畀）大埔民主聯盟成員」。4名大埔攬炒派區議員包括新同盟嘅周炫瑋、陳振哲、姚鈞豪和文念志日前均聲稱，無法接受同事批評辭任者為「逃兵」，齊齊喺fb發文宣布退出「大埔民主聯盟」。●香港文匯報記者 鄭治祖
姚鈞豪喺自己個fb發帖話，「大埔民主聯盟」係為咗喺2019年嘅選舉團結候選人而組成嘅選舉聯盟，不過，??家失去咗原本嘅意義，所以決定正式退出呢個「聯盟」。佢話，有居民喺網上討論緊四里新嘅舖頭造成嘅店舖阻塞問題，聲稱「有議員」喺網上討論相關嘅項目，竟然喺某個post度有人用咗「大埔民主聯盟」嘅fb Page去留言，同胡耀昌講：「我批評您（你）係『逃兵』，遺下蘇州屎比（畀）大埔民主聯盟成員。」
姚鈞豪講一個公共嘅話題，竟然可以變成一個「咁私人嘅攻擊」，又話自己最嬲嘅除咗變成「私人嘅攻擊」之外，個人是接受唔到以「逃兵」呢個詞語形容選擇「離職者」，更批評提出有關言論嘅人係毫無同理心，唔尊重同事喎。
周炫瑋亦喺fb向「大埔民主聯盟」專頁發炮，指聯盟對佢作出惡意批評。佢話，聯盟完全違背當時成立此專頁嘅初衷，事件發展至今亦未有人對此承認責任及公開致歉，令一啲無辜嘅同事被誤以為係始作俑者，呢兩天承受唔少攻擊及責備。因此，佢決定做「逃兵」，退出「大埔民主聯盟」，
周炫瑋仲話，呢個決定與區議員宣誓並無關係，外界唔使過分猜測。
同樣選擇「退盟」嘅文念志亦發文指因為意見不合，又講到同事辭職有個人嘅考量及難處，但就有人帶頭公開指責為「逃兵」，之後又唔認，完全「過晒底線」。佢認為，「聯盟」fb係管理員同事，應該反思一下咁樣形容人係咪合適，如果唔合適，會否考慮收回及道歉。
陳振哲則喺伭b指，佢喺個專頁度被代表，更有人以專頁身份喺周炫瑋議員網上辦公室度留言，結果又冇人肯承擔責任，故只能選擇正式退出聯盟。
譏「聯盟」玩包庇
對於今次鬧劇，網民「Chris Tang」話：「成日鬧人『逃兵』嘅人自己去做烈士！最憎人情緒勒索，道德綁架！」
「Dan Lam」指：「大埔懦夫聯盟，唔好同我講睇唔到邊個留啦！你當我地（哋）唔識玩fb呀？未做過page admin咩？包庇就包庇啦！」