特區政府為防疫推出唔少措施，但偏偏有啲人就漠視規矩，永遠都拖政府後腿。話說日前元朗區防火委員會進行新一屆委員會會議，一名代表消防處出席會議嘅區長拒絕掃描「安心出行」二維碼，仲稱：「我係唔會掃『安心出行』。」並要求拎表格做登記。不過，喺會議室嘅民政處職員當時就話無登記表可以提供，最後雙方把登記一事不了了之，消防區長亦理所當然咁坐低開會。有團體昨日向保安局遞交請願信，所有公務員在抗疫期間都應當以身作則，帶頭抗疫。
特區政府早就喺3月1日規定，政府員工同市民喺出入所有政府大樓或辦公大樓前都要用電話掃描「安心出行」二維碼，但點解呢名消防區長至今都唔配合，仲要唔登記就走入去開會呢？
「N.T. 監察聯盟」前晚喺社交平台fb發文表示，今次事件反映出政府相關部門同職員做事馬虎，漠視政府宣傳防疫政策外，仲罔顧其他人對防疫嘅付出，簡直係置他人生命健康於外，認為相關行為更加有可能涉嫌干犯公職人員行為失當。
民記投訴質疑違忠誠
民建聯立法會議員梁志祥、周浩鼎聯同元朗監察議會聯盟召集人李月民、發言人司徒駿軒噚日就為此向保安局遞信正式投訴，批評嗰位消防區長「咬住官糧反政府」，並質疑其行為拖政府後腿，「違反忠誠」，唔符合《公務員守則》的規定，政府必須正視。
網民支持依法追究
唔少網民都認為該名消防處代表嘅行為令人失望，並支持特區政府要依法追究。「Lau Li」批評：「消防區長和民政署職員都失職，政府必須嚴懲！」「Tang Kwong Kwong」則覺得：「一名政府人員唔肯執行政府政策，應該要解僱佢。」「趙將軍」建議：「要求政府及衛（衞）生署徹查事件，不能姑息養奸，為非作歹，不知廉恥！」「Simon Tang」就話：「（佢）冇資格做公務員！尤其係紀律部門，丟盡消防員架。」 ●香港文匯報記者 倪思言